Mamata Banerjee News : पश्चिम बंगालच्या मुख्यमंत्री ममता बॅनर्जी यांच्या हेलिकॉप्टरचं इमर्जन्सी लँडिंग करण्यात आलेलं आहे. लँडिंग होत असतांना हेलिकॉप्टरला झटके बसल्याने त्या जखमी झाल्या. त्यामुळे त्यांना तातडीने रुग्णालयात हलवण्यात आलं.

आज मंगळवारी ममता बॅनर्जी ह्या जलपाईगुडी येथून बागडोगरा येथे जात होत्या. मात्र हवामान खराब झाल्याने सालुगाडा येथील आर्मी एअरबेसवर त्यांच्या हेलिकॉप्टरचं इमर्जन्सी लँडिंग करण्यात आलं. लँडिंगनंतर ममता यांना कोलकाता येथील एसएसकेएम रुग्णालयात हलवण्यात आलेलं आहे.

हेलिकॉप्टर उतरतांना झटके बसल्याने ममतांच्या पाठीला आणि गुडघ्याला जखम झाली. त्यामुळे त्यांना रुग्णालयात हलवण्यात आलं. दरम्यान, बंगालमध्ये ८ जुले रोजी स्थानिक स्वराज्य संस्थांच्या निवडणुका होणार आहेत. मतदानापूर्वी अर्ज भरण्याच्या प्रक्रियेदरम्यान राज्यभरातून हिंसेच्या घटना घडत आहेत. या घटनांमध्ये अनेकांनी जीवदेखील गमावला आहे.

मीडिया रिपोर्टनुसार, दिनहाटा येथील जरीधल्ला येथे मंगळवारी सकाळी हिंसा भडकली. दोन गट एकमेकांना भिडले. त्यानंतर गोळीबाराची घटना घडली. याच घटनेमध्ये ५ जण जखमी झाल्याची माहिती आहे तर एकाचा मृत्यू झाल्याची माहिती आहे.