नवी दिल्लीमधून सध्या एक धक्कादायक घटना समोर आली असून, एका कर्मचाऱ्याने आपल्या मालकाच्या पत्नीचा खून केल्याचं समोर आलं आहे. दिल्ली पोलिसांनी ताब्यात घेतलेल्या ३१ वर्षीय व्यक्तीने स्वत: या गुन्ह्याची कबूली दिली आहे. पोलिसांनी ताब्यात घेतलेला आरोपी राकेश हा दिल्ली विद्यापीठात सहाय्यक प्राध्याकाच्या वाहनावर चालक म्हणून काम करत होता. त्यावेळी मालकाच्या पत्नीने राकेशला कामावरून काढून टाकण्यास सांगितले होते. या गोष्टीचा राग मनात धरून राकेशने हा गुन्हा केल्याचं समजतं आहे.

सोमवारी सायंकाळी दिल्लीतील बुरारी परिसरात पोलीस गस्त घालत असताना ही घटना उघडकीस आली. त्यानंतर पोलिसांनी आरोपींना अटक करून आरोपीविरूद्ध बुरारी पोलीस ठाण्यात आयपीसीच्या कलम ३०२ अंतर्गत गुन्हा दाखल करण्यात आला आहे. पोलिसांनी घरातून पिंकीचा मृतदेह ताब्यात घेतल्याची माहिती पोलीस उपायुक्त सागर सिंग कलसी यांनी दिली आहे.

चौकशीदरम्यान राकेशने पोलिसांना सांगितले की, दिल्ली विद्यापीठात सहायक प्राध्यापक म्हणून काम करणाऱ्या वीरेंद्र कुमार याच्याशी तो तीन वर्षांपासून तो संपर्कात होता. कुमारने आपली टॅक्सी राकेशला दिली आणि घराच्या वरच्या मजल्यावर त्याच्या कुटुंबाला राहण्यासाठी एक खोली दिली होती.