नवी दिल्ली- देशात कोरोना प्रतिबंधक लशीचा डोस घेऊनही अडीच लाख लोकांना कोरोनाची लागण झाली आहे. आरोग्य मंत्रालयाच्या सूत्रांनुसार, आतापर्यंत देशात 2 लाख 58 हजार 560 लोकांना ब्रेकथ्रू इन्फेक्शन (लस घेतल्यानंतरही संक्रमण ) झाले आहे. यातील 1 लाख 71 हजार 511 लोकांना लशीचा पहिला डोस घेतल्यानंतर आणि 87 हजार 49 लोकांना लशीचा दुसरा डोस घेतल्यानंतर संक्रमण झालं आहे. एनडीटीव्हीने यासंदर्भातील वृत्त दिलं आहे. (Corona Latest News)

16 जानेवारीपासून देशात लसीकरण मोहीम हाती घेण्यात आली. आतापर्यंत 53 कोटींपेक्षा अधिक लोकांना कोरोना प्रतिबंधक लशीचा किमान एक डोस मिळाला आहे. देशात सध्या कोविशिल्ड, कोवॅक्सिन आणि स्पुटनिक लशीचा डोस दिला जात आहे. या तिन्ही लशींचे डोस घेतल्यानंतर लोकांमध्ये कोरोनाचे संक्रमण झाल्याचे पाहायला मिळाले आहे. विशेष म्हणजे दुसरा लशीचा डोस घेतल्यानंतरही विषाणूची लागण झाली आहे. एकूण लसीकरणाच्या 0.048% टक्के लोकांना ब्रेकथ्रू इन्फेक्शन झालं आहे.

कोरोना विरोधातील लढ्यात लसीकरण हेच प्रभावी शस्त्र आहे. त्यामुळे जगभरातील देशांनी लसीकरणावर भर दिला आहे. मोठ्या प्रमाणात लसीकरण झाल्यास हर्ड इम्युनिटी निर्माण होईल. त्यामुळे संक्रमण रोखता येईल. पण, कोरोना लशीचा डोस घेऊनही संक्रमण होत असल्याचं समोर येत आहेत. त्यामुळे लस कितपत प्रभावी आहे, याबाबत प्रश्न उपस्थित होत आहेत.

तज्त्रांच्या मतानुसार, कोरोना प्रतिबंधक लस घेऊनही विषाणूची बाधा होण्यात नवल काही नाही. काही लोकांची इम्युनिटी कमजोर असते त्यामुळे अशा लोकांना कोरोनाची लागण होऊ शकते. असे असले तरी लस घेतलेल्यांमध्ये आजाराची तीव्रता सौम्य असते. शक्यतो अशा रुग्णांना हॉस्पिटलमध्ये दाखल करण्याची वेळ येत नाही. खूप कमी प्रकरणात त्यांना ऑक्सिजनवर ठेवावं लागतं. दरम्यान, देशात गेल्या 24 तासांत 40,120 रुग्णांची नोंद झालीये. देशात डेल्टा प्लसचे रुग्ण आढळून येत आहेत. महाराष्ट्रात डेल्टा प्लसमुळे रुग्णांच्या मृत्यूची नोंद झाली आहे.