बंगळुरु (कर्नाटक) : प्रसिद्ध फॅशन डिझायनर प्रसाद बिडप्पा (Fashion designer Prasad Bidapa) यांचा मुलगा अॅडम बिडप्पा (Adam Bidapa) याला कन्नड चित्रपट अभिनेत्रीला (Kannada Film Actress) अश्लील संदेश (Message) पाठवल्याप्रकरणी शुक्रवारी अटक करण्यात आलीय. अॅडम बिडप्पा विरोधात पोलिसात तक्रार दाखल करणाऱ्या अभिनेत्रीनं म्हटलंय की, अॅडमचे मेसेज पाहून मला आणि माझ्या कुटुंबाला मोठा धक्का बसलाय. एका व्हीआयपीच्या (VIP) मुलानं इतकी खालची पातळी गाठली, यावर माझा विश्वास बसत नाहीय. 25 फेब्रुवारी रोजी रात्री 11 वाजता अॅडमनं मला अश्लील मेसेज पाठवले, त्यावेळी तो पूर्णपणे नशेत होता. त्याचे मेसेज अपमानास्पद, द्वेषपूर्ण आणि खूप दुखावणारे होते. यामुळं गेल्या आठवडाभरात मला खूप मानसिक त्रास झालाय, असं तिनं नमूद केलंय.

अभिनेत्रीनं मीडियाला पाठवलेल्या निवेदनात म्हटलंय की, मी सात महिन्यांची गर्भवती आहे. नकारात्मक ऊर्जा निर्माण करणाऱ्या कोणत्याही गोष्टीपासून मला स्वत:ला दूर ठेवायचाय. अभिनेत्रीनं गुरुवारी इंदिरानगर पोलिस ठाण्यात तक्रार दाखल केली होती. अॅडमच्या वडिलांबद्दल (प्रसाद बिडप्पा) खूप आदर असल्याचंही अभिनेत्रीनं म्हंटलंय.

अभिनेत्रीनं सांगितलं की, पूर्वी अॅडमनं दारूच्या नशेत इतर लोकांचा असाच छळ केला होता, असं त्याच्या आईनं मला सांगितलंय. मला त्याच्या आई-वडिलांचं खूप वाईट वाटतंय; पण मी असहाय्य आहे. मला स्वतःचं रक्षण करावं लागेल. माझी किंवा माझ्या कुटुंबाची बदनामी करणाऱ्या कोणालाही मी सोडणार नाही, असंही तिनं शेवटी सांगितलंय.