आग्रा - उत्तर प्रदेशातील आगरा इथं सोमवारी दुपारी एका केमिकल कारखान्यात भीषण आग लागली. आग इतकी भडकली की परिसरात भीतीचे वातावरण निर्माण झाले आहे. दूर अंतरावरून आगीचे लोळ दिसत होते. ही आग सिकंदरा विभागातील नॅशनल हायवेजवळ भडकली आहे. पोलिस आणि अग्निशमन दल घटनास्थळी दाखल झाले असून बचावकार्य सुरु आहे. 

सिकंदरा क्षेत्रातील हायवेवर सुधीर धर्मकांटे इथं असलेल्या केमिकल फॅक्ट्रीमध्ये ही आग लागल्याची माहिती समोर आली आहे. घटनास्थळी असलेल्या लोकांनी दिलेल्या माहितीनुसार दुपारी दोनच्या सुमारास अचानक धुर दिसायला लागला. त्यानंतर पोलिस आणि अग्निशमन दलाला याची माहिती देण्यात आली. अग्निशमन दलाच्या गाड्या घटनास्थळी दाखल येईपर्यंत आगीने रौद्ररुप धारण केलं होतं. शहराचे एसपी घटनास्थळी आले असून या आगीत कोणतीही जिवित हानी झाली नसल्याचं सांगितलं जात आहे. आग मोठी असल्यानं याबाबत आताच काही सांगता येणार नाही अशी माहिती पोलिसांनी दिली. 

आग्र्यातील सिकंदरा क्षेत्रातील दोन केमिकल फॅक्ट्री या आगीच्या भक्ष्यस्थानी सापडल्या आहेत. आग इतकी भीषण आहे की सुरक्षेच्या दृष्टीने आजुबाजुच्या परिसरातील घरांमधून लोकांना हलवण्यात आलं आहे. आग विझवण्याचे प्रयत्न सुरू आहेत.  आग्र्यातील हायवेच्या शेजारी असलेल्या टॉप लास्ट आणि आग्रा केमिकल नावाच्या दोन कारखान्यात ही आग लागली आहे. या ठिकाणी तयार होणारं केमिकल शूजचे सोल तयार करण्यासाठी वापरले जाते. 

देशातील इतर बातम्या वाचण्यासाठी क्लिक करा

आग विझवण्यासाठी घटनास्थळी अग्निशमन दलाच्या आठ गाड्या दाखल झाल्या आहेत. आजुबाजुला घरे लागून असल्याने आग पसरण्याची भीती व्यक्त केली जात आहे. पोलिसांनी सांगितले की, आग पसरल्यास धोका निर्माण होऊ नये यासाठी काळजी घेतली जात आहे. शेजारच्या घरांमधून लोकांना सुरक्षित स्थळी हलवण्यात आलं आहे. हवाई दल आणि रिफायनरीकडून मदत मागितली आहे. तसंच फायर टेंडरही मागवण्यात आले आहेत.