मडगाव- अन्न व औषध प्रशासनाकडे (एफडीए) नोंदणी न केलेली व इन्सुलेटेड नसलेली इतर राज्यांतील मासळीची वाहने गोव्याच्या सीमेवर आजही अडवून माघारी पाठवण्यात आल्याने गोव्यात आज मासळीची टंचाई निर्माण झाली. एफडीएकडून सुरु असलेल्या वेगवेगळ्या प्रकारच्या कारवाईमुळे गोव्यातील मासळी व्यवसाय विस्कळीत झाला असून कारवाई पुढेही सुरु राहणार असल्याने गोव्यात पुढील काही दिवस मासळीची टंचाई निर्माण होण्याची शक्यता आहे. 

एफडीएने नोंदणी प्रमाणपत्र रद्द केलेल्या मडगावच्या घाऊक मासळी विक्रेत्यांवर कारवाई करण्याचे संकेत दिल्याने सोमवारपासून मासळी व्यवसाय बंद ठेवण्याचा निर्णय मासळी विक्रेत्यांनी घेतला आहे. महाराष्ट्र व कर्नाटक राज्यांतील मासळी पुरवठादारांना मासळी न पाठवण्याची सूचना या विक्रेत्यांनी आज केल्याने सोमवारपासून पुढील काही दिवस गोव्यात मासळीची टंचाई भासण्याची शक्यता आहे.
गोव्याची मासळीची मुख्य बाजारपेठ असलेल्या मडगावच्या घाऊक मासळी मार्केटात आज अवघे 20 टन आवक झाली. काही इन्सुलेटेड वाहने चेकनाक्यावरून सोडण्यात आली. ही वाहने आल्याने घाऊक मार्केटात आज थोड्याफार प्रमाणात मासळीची आवक झाली, अशी माहिती मासळीचे एजंट कांता नाही यांनी दिली.

आज आवक झालेल्या मासळी मध्ये वेरली, लेपो, बांगडे व मोरीचा समावेश होता. वेरलीची महाराष्ट्रातील श्रीवर्धन, अलिबाग, रत्नागिरी येथून आवक झाली तर बांगड्यांचा पुरवठा स्थानिक मच्छीमारांकडून झाला असे नाईक यांनी सांगितले मडगाव घाऊक मार्केटात शनिवारी सुमारे चाळीस टन आवक झाली होती. यात स्थानिक मच्छीमारांकडून पुरवठा झालेल्या मासळीचा भरणा जास्त होता. आज आवक अल्प प्रमाणात झाल्याने मासळीचे दर किलोमागे 20 रुपयांनी वाढले. मडगावच्या घाऊक मार्केटात आज वेरली 60 रुपये किलो, बांगडे ८0 रुपये किलो, लेपो 120 रुपये किलो, मोरी 90 ते 100 रुपये किलो असे दर होते.

एफडीएकडे नोंदणी न केलेल्या मासळी विक्रेत्यांवर कारवाई करण्याचे संकेत असल्याने सोमवारी मासळीची आयात व विक्री न करण्याचा निर्णय मासळी एजंट व विक्रेत्यांनी घेतला आहे असे नाईक यांनी सांगितले.