पाटना - बिहारच्या सासाराममध्ये रामनवमीच्या दिवशी झालेल्या हिंसाचारप्रकरणी रोहतास पोलिसांनी मोठी कारवाई केली आहे. या प्रकरणी भाजपचे माजी आमदार जवाहर प्रसाद यांना रोहतास पोलिसांनी अटक केली आहे. शुक्रवारी रात्री पोलिसांनी जवाहर प्रसादच्या घरी पोहोचून त्यांना अटक केली. जवाहर प्रसाद हे पाच वेळा आमदार राहिले आहेत.

या संदर्भात निवेदन जारी करताना पोलिसांनी सांगितले की, 'सासाराम शहरात 31 मार्च रोजी झालेल्या जातीय तेढ प्रकरणी पोलिसांनी 28 एप्रिलपर्यंत 63 जणांना अटक केली असून दोन आरोपींनी न्यायालयात आत्मसमर्पण केले आहे. 28 एप्रिलच्या रात्री कोर्टाकडून मिळालेल्या अजामीनपात्र वॉरंटची अंमलबजावणी करताना या प्रकरणातील प्राथमिक आरोपींना अटक करण्यात आली आहे. ज्यामध्ये जवाहर प्रसाद, असीम नंदी यांचा समावेश आहे.