देशाचे माजी पंतप्रधान डॉ.मनमोहन सिंग यांना रविवारी दिल्लीच्या ऑल इंडिया इन्स्टिट्युट ऑफ मेडिकल सायन्सेसमधून (AIIMS) उपचारानंतर डिस्चार्ज देण्यात आला. डॉ सिंग यांना संध्याकाळी 5.20 वाजता रुग्णालयातून घरी सोडण्यात आले.

13 ऑक्टोबर रोजी त्यांना एम्समध्ये दाखल करण्यात आले होते आणि तेव्हापासून ते डॉक्टरांच्या देखरेखीखाली होते. मनमोहन सिंग यांच्या वयोमानानुसार प्रकृतीत सुधारणा होण्यास अतिरिक्त कालावधी लागला. अशक्तपणामुळे हे घडल्याचं समोर येत आहे.

या महिन्याच्या सुरुवातीला केंद्रीय आरोग्य मंत्री मनसुख मांडविया यांनी रुग्णालयात येऊन सिंग यांची विचारपूस केली होती. त्यावेळी मनमोहन सिंग यांचा एक फोटो व्हायरल झाला. ज्यावर त्यांची कन्या दामनसिंग यांनी आक्षेप घेतला होता. त्यावर मोठ्या प्रमाणात काँट्रोव्हर्सीही झाली होती.

यानंतर काँग्रेसचे नेते राहुल गांधी यांनीही रुग्णालयात येऊन सिंग यांच्या तब्येतीची चौकशी केली होती. 89 वर्षांच्या माजी पंतप्रधानांना हॉस्पिटलच्या कार्डिओ-न्यूरो सेंटरमधील एका खासगी वॉर्डमध्ये दाखल करण्यात आलं होतं. डॉ. नितीश नाईक यांच्या नेतृत्वाखालील हृदयरोगतज्ज्ञांच्या पथकाच्या देखरेखीखाली होते. अखेर प्रकृतीत सुधारणा झाल्याने त्यांना घरी सोडण्यात आलं आहे.