लखनौ - उत्तर प्रदेशात समाजवादी पक्षाचे सरकार आल्यास गरिबांवर मोफत उपचार केले जातील तसेच वृद्ध आणि विधवांना निवृत्तिवेतन तिप्पट दिले जाईल, असे आश्‍वासन आज समाजवादी पक्षाचे अध्यक्ष अखिलेश यादव यांनी दिले. आगामी निवडणुकीत मतदार भाजपचा सफाया करतील असा विश्‍वासही त्यांनी व्यक्त केला.

हरडोईच्या संडिला येथे महाराज सल्हीय अर्कवंशी यांच्या मूर्ती स्थापना दिवसानिमित्त सभेचे आयोजन करण्यात आले होते. त्यावेळी बोलताना अखिलेश म्हणाले की, आम्ही आताच काही योजना सांगणार नाही. कारण भाजपकडून त्याची नक्कल होऊ शकते. आमच्या मातांना आणि बहिणींना सध्या पाचशे रुपये मिळतात. सध्याची महागाई पाहता ही रक्कम खूपच कमी आहे. यूपीत समाजवादी पक्षाचे सरकार आल्यास ही रक्कम तीन पटीने वाढवली जाईल. भाजपने राज्यातील लाखो लोकांना नोकरी देण्याचे आश्‍वासन दिले होते. किती जणांना रोजगार मिळाला, हे सर्वांनाच ठावूक आहे.