दिल्लीत शेतकरी आंदोलनाला समर्थन दर्शवण्यासाठी उद्या (सोमवारी) देशभरात भारत बंद आंदोलन पुकारण्यात येणार आहे. याला पाठिंबा देण्यासाठी बँक युनियनपासून सर्व विरोधी पक्षांनी शेतकऱ्यांच्या संपाला पाठिंबा दिला आहे.

हा बंद सकाळी 6 ते संध्याकाळी 4 या वेळेत होणार असून त्या दरम्यान सर्व शासकीय आणि खासगी कार्यालये बंद असतील. तसेच शैक्षणिक आणि इतर संस्था, दुकाने, उद्योग आणि व्यावसायिक प्रतिष्ठाने आणि सार्वजनिक कार्यक्रम बंद राहणार आहेत.

राष्ट्रपतींची मंजुरी मिळाल्यानंतर तीन शेतकरी कायदे अस्तित्वात आले. यानंतर दिल्लीच्या वेशीवर मोठ्या प्रमाणात शेतकरी एकत्र जमले होते. या आंदोलनाच्या पहिल्या वर्धापन दिनानिमित्त संयुक्त किसान मोर्चा (एसकेएम) ने सोमवारी भारत बंदची हाक दिली आहे. त्याला राजकीय पक्षांसह समाजातील सर्व घटकांचा पाठिंबा मिळाला आहे.

पंजाबचे नवनियुक्त मुख्यमंत्री चरणजितसिंग चन्नी यांनी बंदला पाठिंबा दिला आहे. तर बिहार विधानसभेतील विरोधी पक्षनेते तेजस्वी यादव यांनी देशव्यापी संपात सहभागी होण्याची घोषणा केली आहे. आंध्र प्रदेश आणि तामिळनाडू सरकारनेही देशव्यापी संपाला पूर्ण पाठिंबा जाहीर केला आहे. काँग्रेसनेही सोमवारी निदर्शनांमध्ये सहभागी होणार असल्याचे म्हटले आहे.