दिल्लीतील रोहिणी कोर्ट गोळीबारातील आरोपी गँगस्टर टिल्लू ताजपुरिया याच्यावर तिहार तुरुंगात प्रतिस्पर्धी टोळी सदस्य योगेश टुंडा आणि इतरांनी हल्ला करून त्याची हत्या केली.

टिल्लू ताजपुरिया याला दिल्लीतील दीनदयाल उपाध्याय रुग्णालयात नेण्यात आले, तेथे त्याला मृत घोषित करण्यात आले आहे. पुढील तपास पोलीस करत आहेत, अशी माहिती कारागृह अधिकाऱ्यांनी दिली आहे.

ताजपुरिया २०२१ च्या रोहिणी कोर्ट गोळीबारात मुख्य आरोपी होता. रोहित नावाचा आणखी एक कैदीही या हल्ल्यात जखमी झाल्याचे पोलिसांनी सांगितले. तो आता धोक्याबाहेर असल्याचे सांगण्यात येत आहे. (Delhi News)

पश्चिम जिल्ह्याचे अतिरिक्त पोलिस उपायुक्त अक्षत कौशल म्हणाले, “आज सकाळी ७ वाजता तिहार तुरुंगातून दीनदयाळ उपाध्याय रुग्णालयात दोन अंडरट्रायल आणल्याची माहिती मिळाली. त्यापैकी एक सुनील उर्फ ​​टिल्लू असून त्याला बेशुद्धावस्थेत आणण्यात आले होते. नंतर त्याला मृत घोषित करण्यात आले. रोहित नावाच्या आणखी एका व्यक्तीवर उपचार सुरू असून तो धोक्याबाहेर आहे.