बेळगाव : लग्नास (Marriage) टाळाटाळ केल्याने युवतीने गळफास घेऊन आत्महत्येचा प्रयत्न केला होता. तिला अत्यवस्थ अवस्थेत रुग्णालयात दाखल केले असता उपचारादरम्यान शुक्रवारी (ता.१३) मृत्यू झाला. शशिकला मुरलीधर पम्मार (वय २८, रा. कलमड डीएलटी, ता. रामदुर्ग, सध्या रा. द्वारकानगर, बेळगाव) असे तिचे नाव आहे.

याप्रकरणी प्रियकराविरोधात टिळकवाडी पोलिस (Tilakwadi Police) ठाण्यात गुन्हा दाखल करण्यात आला आहे. याबाबत पोलिसांनी सांगितले की, शशिकलाचे राजशेखर हणमंत जराळे (वय ४०, रा. विजापूर) याच्याशी प्रेमसंबंध होते. गेल्या सहा वर्षांपासून शशिकला त्याला लग्नासाठी वारंवार विचारणा करत होती. मात्र, तो त्यास टाळाटाळ करत असल्याने तिचे मानसिक संतुलन बिघडले होते.

त्यामुळे तिला ११ ऑक्टोबर रोजी एका खासगी रुग्णालयात उपचारासाठी दाखल केले होते. उपचार घेऊन बरे झाल्यानंतर १२ ऑक्टोबरला राजशेखरला घरी बोलावून घेतले. मात्र, शशिकला व राजशेखर यांच्यात पुन्हा बाचाबाची झाली. त्यामुळे नैराश्यातून शशिकलाने राहत्या घरी गळफास लावून आत्महत्येचा प्रयत्न केला. मात्र, उपचारादरम्यान तिचा मृत्यू झाला.