नवी दिल्ली - उन्नाव बलात्कार पीडितेच्या एका याचिकेवर सुनावणीवेळी दिल्लीतील न्यायालायने तिला घराबाहेर पडू नये असा सल्ला दिला आहे. न्यायालयाने पीडितेला सुनावणी होईपर्यंत फक्त गरज असेल तरच बाहेर पडावं असं सांगितलं आहे. तसंच कुठे जाण्याआधी आपल्या खासगी सुरक्षा अधिकाऱ्यांना माहिती देण्याचे आदेशही दिले आहेत. उन्नाव बलात्कार पीडितेला सीआरपीएफची सुरक्षा पुरवण्यात आली आहे. हे आदेश जिल्हा आणि सत्र न्यायाधीश धर्मेश शर्मा यांनी दिले आहेत.

उन्नवाव बलात्कार पीडितेनं न्यायालाय याचिका दाखल करताना सुरक्षा अधिकाऱ्यांवर गंभीर आरोप केले होते. यानंतर न्यायालयाने आदेश दिले आहेत. जिल्हा आणि सत्र न्यायाधीश धर्मेश शर्मा यांनी म्हटले की, कुठेही जाण्याआधी सुरक्षा अधिकाऱ्यांना माहिती द्या. त्यांना तुमच्या सुरक्षेसाठी तैनात केलं आहे. तुम्हाला असं नियोजन करायला हवं की दर दिवशी बाहेर पडायला लागू नये. गरज असेल तेव्हाच घराबाहेर पडा. हे प्रकरण संपेपर्यंत तुम्हाला काळजी घ्यायला हवी.

न्यायालयाने म्हटलं की, बलात्कार पीडिता आणि तिच्या सुरक्षा रक्षकांमध्ये या मुद्द्यावर एकमत झालं आहे. तसंच जर पीडिता किंवा तिच्या कुटुंबातील इतर कोणी या प्रकरणी वकिलांना भेटू इच्छित असतील तर त्यासाठी एक दिवस आधीच माहिती देण्याचा प्रयत्न करायला पाहिजे असंही सांगितलं आहे.

उन्नाव बलात्कार प्रकरणी भाजपचे निलंबित आमदार कुलदीप सिंह सेंगर तुरुंगात आहेत. त्यांनी तरुणीचे 2017 मध्ये अपहरण करून बलात्कार केला होता. त्यावेळी तरुणी अल्पवयीन होती. सेंगर यांना या प्रकरणी 20 डिसेंबर 2019 मध्ये जन्मठेपेची शिक्षा सुनावली होती. याशिवाय न्यायालयाने 2019 मध्ये बलात्कार पीडिता, तिचे कुटुंबियांना सीआरपीएफ सुरक्षा पुरवण्याचे आदेश दिले होते.