लखनऊ - कोरोनाचं संकट ही एक संधी आहे. या संकटाला संधीत बदला असं पंतप्रधान नरेंद्र मोदी यांनी म्हटलं होतं. मोदींचा हा मंत्र उत्तर प्रदेशने अंमलात आणल्याचं दिसत आहे. उत्तर प्रदेश सरकारने गेल्या 8 महिन्यात जवळपास 137 कोटी रुपये कमावले आहेत. सरकारने कोरोना काळात उत्तर प्रदेशसह राज्याच्या बाहेर सॅनिटायझर विक्रीतून ही कमाई केली आहे. 

उत्तर प्रदेशच्या महसूल विभागाने प्रसिद्ध केलेल्या आकडेवारीनुसार राज्यातील साखर कारखान्यांमध्ये आणि लहान युनिटमध्ये 24 मार्च ते 15 नोव्हेंबर पर्यंत 177 लाख लिटर सॅनिटायझरचे विक्रमी उत्पादन घेण्यात आलं. यातून सरकारला तब्बल 137 कोटी रुपये मिळाले आहे. उत्पादन केलेल्या सॅनिटायझरपैकी बाहेरील राज्यांमध्ये 78.38 लाख लीटर सॅनिटायझरची विक्री करण्यात आली. तर एकूण उत्तर प्रदेशात 87 लाख लीटर सॅनिटायझर विक्री झाली. अशा प्रकारे एकूण 165.39 लाख लीटर सॅनिटायझरची विक्री झाल्याची माहिती विभागाने दिली. 

हे वाचा - Good News! 'अमेरिकेत कोरोना लसीकरण कार्यक्रम डिसेंबरपासून सुरु होऊ शकतो'

मुख्य सचिव संजय आर भूसरेड्डी यांनी म्हटलं की, अबकारी विभागाने सॅनिटायझरचे वेळेवर उत्पादन केलं आणि बाजारात वेळेवर उपलब्ध होईल यासाठी काळजी घेतली. यामुळेच उत्तर प्रदेशला सॅनिटायझरमधून उत्पन्न मिळवण्यात एक विक्रम रचता आला. सॅनिटायझरच्या उत्पादनातून 12,848 लाख रुपयांचा जीएसटी आणि 794 लाख रुपयांचे परवाना शुल्क विभागाला मिळाले. उत्पन्नासह कोरोनाविरोधात लढण्यासाठी सॅनिटायझरची भूमिका महत्त्वाची ठरली असंही ते म्हणाले. 

उत्तर प्रदेशात कोरोनाचे 5 लाखांहून अधिक रुग्ण आतापर्यंत आढळले आहेत. यापैकी 4 लाख 93 हजार जण कोरोनामुक्त झाले असून आतापर्यंत राज्यात 7 हजार 524 जणांचा कोरोनामुळे मृत्यू झाला आहे. देशातील कोरोना रुग्णांची आकडेवारी 91 लाखांच्यावर पोहोचली आहे. तर मृतांचा आकडा 1 लाख 34 हजारांच्या वर गेला आहे. 

हे वाचा - कोरोना काळात 'वर्क फॉर्म होम'; मेंटल हेल्थसाठी वरदान की शाप?

एकीकडे कोरोनाची लस शोधण्यासाठी जगभरात संशोधन सुरू आहे. काही लशींच्या चाचण्या अंतिम टप्प्यात आल्या असून कोरोनावर प्रभावी ठरत आहेत. असे असतानाही कोरोनाच्या तिसऱ्या लाटेचा धोक्याची शक्यता असल्याची भीती जागतिक आरोग्य संघटनेनं व्यक्त केली आहे. तसंच कोरोनाची लस 2021 च्या पहिल्या तिमाहीत येऊ शकते. त्यादृष्टीने अनेक देशांनी वितरण प्रणाली सज्ज करण्यास सुरुवात केली आहे.