अहमदाबाद : भाजपचे प्रदेश उपाध्यक्ष आणि माजी आमदार जयंती भानुशाली यांच्याविरुद्ध 21 वर्षे वयाच्या महिलेचे अपहरण करून बलात्कार केल्याप्रकरणी गुन्हा दाखल झाला असून, त्यांना कधीही अटक होण्याची शक्‍यता आहे. सुरत पोलिसांनी त्यांच्याविरोधात एफआयआर दाखल केले आहे. 

कॉंग्रेस कार्यकर्त्यांनी पीडित महिलेसह पोलिस आयुक्तांच्या कार्यालयासमोर जोरदार हंगामा केल्यानंतर अखेर पोलिसांना भानुशाली यांच्याविरूद्ध गुन्ह्याची नोंद करावी लागली. पोलिस आयुक्त सतीश शर्मा यांनी सांगितले, की पीडितेने भानुशाली आणि त्यांच्या सहकाऱ्यांविरुद्धही तक्रार नोंदविली आहे. त्यांच्याविरुद्ध बलात्कार, अपहरण आणि अन्य कलमांखाली गुन्हा दाखल करण्यात आला आहे. 

दरम्यान, या प्रकरणाचा तपास पोलिस उपायुक्त लीना पाटील यांच्याकडे सोपविण्यात आला असून, त्यांनी पीडित महिलेचा जबाब नोंदवून घेतला. फॅशन डिझायनिंग कॉलेजमध्ये प्रवेश मिळवून देण्याच्या आमिषाने भानुशाली यांनी बलात्कार केला आणि त्याचा व्हिडिओ बनवून सातत्याने लैंगिक शोषण केल्याचा आरोप पीडित महिलेने केला आहे. बलात्काराच्या आरोपानंतर भानुशाली यांनी भाजपच्या प्रदेश उपाध्यक्षपदाचा राजीनामा दिला आहे.