गांधीनगर : लग्नसमारंभादरम्यान (Wedding Ceremony) घोड्यावर स्वार झाल्याने दलित वराला शिवीगाळ व मारहाण करण्याची धक्कादायक घटना गुजरातेतील गांधीनगर (Gujarat Gandhinagar) जिल्ह्यातील चाडसाना गावात घडली. याप्रकरणी पोलिसांनी चारजणांना अटक केली.

संबंधित वर लग्नानिमित्त घोड्यावर (Horse) स्वार झाला होता. तेथून जवळपास १०० जणांसह तो वधूच्या गावातील घराकडे जात होता. त्यावेळी, दुचाकीवरून आलेल्या एकाने घोडा थांबवून त्याला खाली उतरवून थप्पड मारली, अशी तक्रार त्याच्या भावाने केली आहे.

यावेळी हल्लेखोरांनी वराला जातिवाचक शिवीगाळ केल्याचेही त्याने या तक्रारीत म्हटले आहे. केवळ आपल्या समुदायातील लोकच घोड्यावर स्वार होऊ शकतात, असे म्हणत त्यांनी दलित (Dalit Groom) वराला मारहाण केली. या ठिकाणी नंतर आणखी तीन जण आले. चौघांनी वराला शिवीगाळ करत धमकी दिली, असा उल्लेखही ‘एफआयआर’ मध्ये करण्यात आला आहे.

या घटनेनंतर वराने घोड्याऐवजी मोटारीतून वधूचे घर गाठले. शैलेश ठाकोर, जयेश ठाकोर, समीर ठाकोर आणि अश्विन ठाकोर अशी या चौघा आरोपींची नावे असून ते सर्व ओबीसी समुदायातील आहेत. त्यांच्याविरुद्ध ॲट्रोसिटीसह विविध कलमानुसार गुन्हा दाखल झाला आहे.