नवी दिल्लीः गुजरातच्या मोरबी येथील एका सोळा वर्षीय विद्यार्थीनीचा ब्रेन हॅमरेजमुळे मृत्यू झाला आहे. ही विद्यार्थीनी दहावीच्या बोर्ड परीक्षेत ९९ टक्के गुण घेऊन टॉपर ठरली होती.

माध्यमिक आणि उच्च माध्यमिक शिक्षण मंडळ, गुजरातने ११ मे रोजी दहावी बोर्डाचा निकाल जाहीर केला होता. या परीक्षेत हीर घेटिया या विद्यार्थीनीने ९९.७० टक्के गुण मिळवले होते.

सदरील विद्यार्थीनीवर महिन्याभरापूर्वी ब्रेन हॅमरेजमुळे राजकोट येथील खासगी रुग्णालयात दाखल केले होते. तिच्या मेंदूवर शस्त्रक्रिया पार पडली आणि तिला रुग्णालयातून सुटी देण्यात आली. मागच्या आठवड्या तिला अचानक श्वास घेण्यासाठी त्रास होऊ लागला, शिवाय छातीत त्रास झाला. त्यामुळे तिला पुन्हा रुग्णालयात दाखल करण्यात आले.

आयसीयूमध्ये तिच्यावर उपचार सुरु झाले आणि एमआरआय रिपोर्ट काढण्यात आला. त्यात तिच्या मेंदूने ८० ते ९० टक्के काम करणं बंद केल्याचं निदर्शनास आलं. त्यातच बुधावरी हीरचा मृत्यू झाला.

विद्यार्थीनीच्या मृत्यूनंतर तिच्या पालकांनी तिचे डोळे आणि बॉडी डोनेट केली आहे. ''हीरला डॉक्टर व्हायचं होतं, परंतु तिचं स्वप्न पूर्ण होऊ शकलं नाही. आम्ही तिचं शरीर डोनेट केलं असून त्यामुळे इतरांचे प्राण वाचू शकतील'', असं तिच्या पालकांनी सांगितलं.