Uniform Civil Code: गुजरात विधानसभा निवडणूकीच्या पार्श्वभूमिवर राजकीय वातावरण चांगलेच तापताना दिसता आहे. दरम्यान या निवडणुकीपूर्वी भारतीय जनता पक्षाने मोठी राजकीय खेळी खेळली आहे. गुजरात मंत्रिमंडळाच्या बैठकीनंतर राज्याचे गृहमंत्री हर्ष संघवी म्हणाले की, पंतप्रधान नरेंद्र मोदी आणि केंद्रीय गृहमंत्री अमित शहा यांच्यापासून प्रेरणा घेऊन मुख्यमंत्री भूपेंद्र पटेल यांनी मंत्रिमंडळाच्या बैठकीत ऐतिहासिक निर्णय घेण्यात आला आहे. राज्यात समान नागरी संहिता लागू करण्यासाठी आता एक समिती स्थापन करण्यात येणार असल्याची त्यांनी घोषणा केली आहे.

मंत्रिमंडळाच्या या निर्णयाची माहिती देताना केंद्रीय मंत्री पुरुषोत्तम रुपाला म्हणाले की, गुजरातमध्ये समान नागरी संहिता (यूसीसी) लागू करण्यासाठी समितीचे अध्यक्ष उच्च न्यायालयाचे निवृत्त न्यायाधीश असतील आणि त्यात तीन ते चार सदस्य असतील.

या महिन्याच्या सुरुवातीला केंद्र सरकारनेही समान नागरी संहिता लागू करण्याबाबत सर्वोच्च न्यायालयात प्रतिज्ञापत्र दिले होते. त्यात म्हटले आहे की, केंद्र सरकार संसदेला समान नागरी संहितेबाबत कोणताही कायदा बनवण्याचे किंवा त्याची अंमलबजावणी करण्याचे निर्देश देऊ शकत नाही. वारसाहक्क, वारसा, दत्तक घेणे, विवाह, घटस्फोट, पालनपोषण आणि देखभाल भत्ता यांचे नियमन करणाऱ्या वैयक्तिक कायद्यांमध्ये एकसमानता आणण्यासाठी ज्येष्ठ वकील अश्विनी उपाध्याय यांनी याचिका दाखल केली होती. या याचिकेवर केंद्र सरकारने प्रतिज्ञापत्र दाखल केले होते.