अहमदाबाद : कच्छ जिल्ह्यात मुंद्रा बंदराजवळ अदानी समूहाला (Adani Group) दिलेली सुमारे १०८ हेक्टर जमीन परत घेणार असल्याची माहिती काल गुजरात सरकारने गुजरात उच्च न्यायालयात (Gujarat High Court) दिली. जनावरांच्या कुरणासाठी असलेली जमीन २००५ मध्ये अदानी समुहाच्या एका कंपनीला दिली होती.

नवीनल गावातील ग्रामस्थांनी अदानी पोर्टस ॲड एसईझेड लिमिटेडला (एपीएसईझेड) गावालगतची कुरणाची २३१ एकर जमीन देण्याच्या गुजरात सरकारच्या (Gujarat Govt) निर्णयाविरुद्ध गुजरात उच्च न्यायालयात जनहित याचिका दाखल केली होती. राज्याच्या महसूल विभागाने २००५ मध्ये ही जमीन अदानी कंपनीला दिली होती, मात्र ग्रामस्थांना त्याची माहिती २०१० मध्ये लागली.

‘एपीएसईझेड’ने या कुरणाच्या जमिनीवर कुंपण घालण्यास सुरवात केली, तेव्हा ग्रामस्थांना ही जमीन अदानी समुहाला दिल्याचा शोध लागला. त्यामुळे त्यांनी याचिका दाखल करण्याचा निर्णय घेतला. राज्य सरकारने कुरणासाठी ३८७ हेक्टर अतिरिक्त सरकारी जमीन उपलब्ध करून देण्याची हमी देत तसे आदेश उपायुक्तांनी काढले. मात्र तशा कोणत्याच हालचाली न झाल्याने ग्रामस्थांनी उच्च न्यायालयात अवमान याचिका दाखल केली.