अहमदाबाद : भारतीय तटरक्षक दलांच्या जवानांनी भारताच्या सागरी सीमेवर पाकिस्तानी नौकांमधून 300 कोटी रुपयांचे हेरॉईन जप्त केले आहे. त्याचबरोबर 9 पाकिस्तानी तस्करांना तटरक्षक दलांनी ताब्यात घेतले आहे. ही घटना गुजरातजवळील जाखो येथे अरबी समुद्रात घडली आहे.

गुजरात दहशतवाद विरोधी पथक आणि भारतीय तटरक्षक दलाच्या संयुक्त कारवाईत अल हज या पाकिस्तानी बोटीची गुजरातच्या किनारपट्टीवर जाखोजवळ घेराव घालून झडती घेण्यात आली, त्यात सुमारे 56 किलो हेरॉईन पकडण्यात आले आहे. त्याचबरोबर एटीएसने नऊ पाकिस्तानी तस्करांनाही ताब्यात घेतले असल्याची माहिती संरक्षण विभागाच्या जनसंपर्क अधिकाऱ्यांनी दिली आहे.

संरक्षण विभागाच्या जनसंपर्क अधिकाऱ्याच्या म्हणण्यानुसार, एटीएस आणि भारतीय तटरक्षक दलाने मिळून अरबी समुद्रात पाण्याच्या आत एक पाकिस्तानी बोट पकडली, ज्यामध्ये नऊ जण होते. त्यांच्याकडे जवळपास 300 कोटी किंमतीचे हेरॉईन आढळून आले, त्यानंतर एटीएसकडून अंमली पदार्थ जप्त करण्यात आलं असून नऊ पाकिस्तानी तस्करांनाही ताब्यात घेतलं आहे.

दरम्यान चार दिवसांपूर्वी गुजरातमधील कच्छ जिल्ह्यातील कांडला बंदरावर 260 किलो वजनाचे हेरॉईन जप्त केले होते. दहशतवादविरोधी पथक आणि महसूल गुप्तचर संचालनालयाकडून ही संयुक्त कारवाई करण्यात आली होती. त्या 260 किलो अंमली पदार्थाची किंमत सुमारे 1300 कोटी इतकी होती असं महसूल विभागाने सांगितलं होतं.

गुजरातमध्ये बंदर परिसरात सारख्या अंमली पदार्थाच्या तस्करीच्या घटना होत असतात. अंमलीपदार्थ तस्करी विरोधी पथकाकडून आणि एटीएसकडून त्यांच्यावर कारवाई करण्यात येत असते.