Arvin Kejriwal News : गुजरातमध्ये आगामी काळात होणाऱ्या विधानसभेसाठी केजरीवालाच्या पक्षाने कंबर कसल्याचे दिसून येत आहे. गुजरातमधील विजयासाठी आम आदमी पक्षाने आपली सर्व ताकद पणाला लावली असून, विजयी मोहोर उमटवण्यासाठी केजरीवालांनी गुजरातला अनेक दौरे केले आहे. मात्र, आजच्या गुजरात दौऱ्यामध्ये त्यांनी दिलेल्या कानमंत्राची जोरदार चर्चा सुरू असून, तुम्ही भाजप सोडू नका, भाजप तुम्हाला पैसे देते ते घ्या मात्र, काम आपचे करा असा कानमंत्री केजरीवाल यांनी मोदींच्या गुजरातमध्ये दिला आहे.

आमच्या पक्षाला भाजपचे मोठ मोठे नेते नको तर, त्यांच्या पन्नाप्रमुखांची आणि कार्यकर्त्यांची गरज असून, भाजपचे कार्यकर्ते मोठ्या संख्येने आम आदमी पार्टीमध्ये सामील होत असल्याचा दावादेखील केजरीवाल यांनी केला आहे. यावेळी मी कृतघ्न नाही. तुमच्या सर्व मागण्या मी महिनाभरात पूर्ण करेले अशी ग्वाही उपस्थितांना संबोधित करताना दिली. भाजपला त्यांचा पराभव दिसून येत असल्यानेच आमच्या पक्षाच्या पदाधिकाऱ्यांवर हल्ले केले जात आहे. मात्र, आम्ही घाबरणाऱ्यांमधले नाही.

सुरतमध्ये 12 पैकी 7 जागा 'आप' जिंकेल

केजरीवाल म्हणाले, पक्षातर्फे करण्यात आलेल्या सर्वेक्षणात आमचा पक्ष सुरतमध्ये 12 पैकी 7 जागा जिंकेल असे स्पष्ट चित्र आहे. वेळ कमी आहे, त्यामुळे सर्वांनी आपापल्या स्तरावर प्रचार करावा असे आवाहनही केजरीवाल यांनी जनतेला केले आहे. 27 वर्षे भाजपने कर्मचाऱ्यांसाठी काहीही केलेले नसून निवडणुकीच्या तीन महिने आधी त्यांना पुन्हा लॉलीपॉप देतील अशी टीकाही त्यांनी केली.