कोलकता : कोलकता उच्च न्यायालयातील न्यायाधीश अभिजित गंगोपाध्याय यांनी मंगळवारी पदाचा राजीनामा दिला. भाजपमध्ये प्रवेश करणार असल्याचा मनोदय त्यांनी राजीनाम्यानंतर जाहीर केला. यामुळे गंगोपाध्याय विधी सेवेतून राजकारणात उतरणार असल्याचे स्पष्ट झाले आहे.

पत्रकार परिषदेत आज त्यांनी तृणमूल काँग्रेस पक्षावर टीका केली. ‘‘भ्रष्टाचाराचा समानार्थी शब्द ‘तृणमूल काँग्रेस’ आहे आणि त्याविरोधात मी शेवटपर्यंत लढेन. मी ७ मार्चला भाजपमध्ये प्रवेश करणार आहे.

भाजप हा राष्ट्रीय पक्ष आहे आणि बंगालमधील ‘तृणमूल’च्या भ्रष्टाचाराविरुद्ध तो लढत असल्याने मी भाजपमध्ये सहभागी होत आहे,’’ असे ते म्हणाले. राजकीय प्रवेशाबद्दल त्यांनी स्पष्टीकरण दिले असले तरी लोकसभा निवडणूक लढवणार की नाही यावर थेट उत्तर देण्याचे टाळले.

‘‘मी निवडणूक लढवावी की नाही हे भाजप नेतृत्व ठरवेल. ते जो निर्णय घेतील तो मला मान्य असेल. ‘तृणमूल’च्या अन्याय आणि भ्रष्टाचाराविरोधात लढणार,’’ असे गंगोपाध्याय यांनी सांगितले.

ते म्हणाले, ‘‘२००९ च्या लोकसभा निवडणुकीत ‘माकप’च्या नेतृत्वाखालील डाव्या आघाडीचा पराभव झाला. याचा परिण्याबाबत ते म्हणाले की, गेल्या काही दिवसांपूर्वी मी हा निर्णय घेतला. ‘तृणमूल’विरुद्ध लढण्यासाठी हेच योग्य व्यासपीठ आहे असे वाटले. सुवेंदू अधिकारी यांच्यावरील भ्रष्टाचाराच्या आरोपांबद्दल विचारले असता, ते म्हणाले, की त्यांना व इतर नेत्यांना अडकविण्यासाठी शिजवलेला हा कट आहे.

सहा वर्षांचा सेवाकाळ

गंगोपाध्याय यांनी त्यांचे राजीनामा पत्र राष्ट्रपती द्रौपदी मुर्मू यांना पाठविले आहे. तसेच त्याच्या प्रती सर्वोच्च न्यायालयाचे सरन्यायाधीश धनंजय चंद्रचूड आणि कोलकता उच्च न्यायालयाचे मुख्य न्यायाधीश टी.एस. शिवगनम यांना सकाळी पाठवल्या.गंगोपाध्याय हे २ मे २०१८ रोजी कोलकता उच्च न्यायालयात अतिरिक्त न्यायाधीश म्हणून रुजू झाले होते. ३० जुलै २०२० रोजी त्यांची कायमस्वरूपी न्यायाधीश म्हणून नियुक्ती करण्यात आली होती.