भोपाळ - देशात कोरोनाचा कहर सुरु असून काही राज्यांमध्ये नाइट कर्फ्यू लावण्यात आला आहे. तसंच अनेक ठिकाणी वीकेंड लॉकडाऊनही केलं आहे. तरीही नागरिकांकडून सोशल डिस्टन्सिंगचं पालन होताना दिसत नाही. नागरिक कोरोना नियमावलीचं उल्लंघन करताना दिसता. मास्क, सॅनिटायझर यांचा वापरही करत नसल्याचं दिसतंय. आता असाच एक धक्कादायक व्हिडीओ समोर आला आहे. यामध्ये कोरोना पॉझिटिव्ह रुग्णाला नेणाऱी रुग्णवाहिका चक्क उसाच्या रसाच्या गाड्यावर थांबल्याची पहायला मिळते. यातही पीपीई सुट घातलेला कर्मचारी मास्क न घालता अॅम्ब्युलन्समधून बाहेर येऊन रसाचा ग्लास घेण्यासाठी वाट पाहत असल्याचं दिसतं. 

मध्य प्रदेशातील भोपाळमधला हा व्हिडीओ असून आरोग्य कर्मचारी कोरोनाबाधित रुग्णाला घेऊन शहारतून फिरताना दिसत आहेत. एवढंच नाही तर कोरोना बाधिताला घेऊन चक्क उसाचा रस पिण्यासाठी रसवंती गृहात पोहोचले. त्यावेळी तिथं असलेल्या एकाने या संपूर्ण प्रकाराचा व्हिडीओ शूट केला आहे. सध्या हा व्हिडीओ सोशल मीडियावर व्हायरल होत आहे. आरोग्य कर्मचाऱी बराच वेळ उसाचा रस पिण्यासाठी थांबले होते. त्यावेळी गाडीमध्ये कोरोना बाधित रुग्ण अस्वस्थ अवस्थेत असल्याचंही दिसतं.

एका कोरोनाबाधित रुग्णाला आपण नेत आहोत याचाच विसर आरोग्य कर्मचाऱ्यांना पडलाय का आणि याचं काही गांभीर्य त्यांना आहे की नाही असा प्रश्नही विचारला जात आहे. धक्कादायक गोष्ट म्हणजे आरोग्य कर्मचाऱी मास्क न लावता तसाच उभा राहिला आहे. व्हिडीओ शूट करणारी व्यक्ती संबंधित कर्मचाऱ्याला विचारते की गाडीत कोरोना बाधित आहे का तर हो असंही उत्तर आरोग्य कर्मचारी देतो. 

हे वाचा - देशात कोरोनामुक्त होण्याचं प्रमाण घसरतंय; आरोग्यमंत्र्यांनी दिलेल्या माहितीने चिंता वाढली

याप्रकरणी आरोग्य विभागाकडून कोणतीही माहिती मिळालेली नाही. डॉक्टर मेघ सिंह सागर यांनी सांगितलं की, मी व्हिडीओ पाहिला नाही आणि असा काही प्रकार झाल्याचं माझ्यापर्यंत तरी पोहोचलं नाही. या प्रकाराची चौकशी करू आणि दोषींविरोधात कठोर कारवाई कऱण्यात येईल असंही त्यांनी सांगितलं.