World Cup Final : रविवारी झालेल्या आयसीसी क्रिकेट वर्ल्डकपच्या अंतिम सामन्यात ऑस्ट्रेलियाकडून भारताचा पराभव झाला. या विश्वचषकात एकही सामना न हरलेल्या टीम इंडियाकडून सर्व भारतीयांना मोठ्या अपेक्षा होत्या. मात्र, अंतिम सामन्यात झालेल्या पराभवामुळे कोट्यवधी भारतीयांचं स्वप्न धुळीला मिळालं.

क्रिकेट फॅन्ससाठी हा एक मोठा धक्का होता. हा विश्वचषक गमावल्याच्या दुःखामुळे दोन तरुणांनी आत्महत्या केल्याचंही समोर आलं आहे. पश्चिम बंगाल आणि ओडिशामध्ये हे प्रकार घडले. (Cricket Fans Suicide)

पश्चिम बंगालमधील बांकुरा येथे राहणाऱ्या राहुल लोहार (वय 23) या तरुणाने रविवारी सामना संपल्यानंतर रात्री 11 च्या सुमारास आत्महत्या केली. त्याने आपल्या रुममध्ये जाऊन गळफास घेतल्याची माहिती त्याचा मेहुणा उत्तम सूर याने दिली. इंडिया टीव्हीने याबाबतचं वृत्त प्रसिद्ध केलं आहे.

ओडिशामध्येही असाच प्रकार

ओडिशा राज्यातील जयपूर जिल्ह्यात देखील असाच प्रकार समोर आला. 23 वर्षांच्या एका तरुणाने आपल्या घराच्या छतावर गळफास घेऊन आत्महत्या केली. देव रंजन दास असं या तरुणाचं नाव होतं. रविवारी रात्री क्रिकेट सामना संपल्यानंतर काही वेळातच त्याने आत्महत्या केली.

देव याच्यावर आधीपासूनच मानसिक उपचार सुरू होते. 'इमोशनल डिसऑर्डर सिंड्रोम'बाबत त्याच्यावर उपचार सुरू होते, अशी माहिती त्याच्या काकांनी दिली. सामना संपल्यानंतर तो तणावामध्ये घरातून बाहेर पडला होता, असं त्याच्या कुटुंबीयांनी सांगितलं. या दोन्ही प्रकरणांमध्ये आकस्मिक मृत्यूची नोंद करण्यात आली आहे.