मोरबीः गुजरातच्या मोरबी जिल्ह्यातील माचू नदीवरील पूल कोसळल्याने १३५ जणांचा मृत्यू झाला आहे. तर अनेक लोक लोक जखमी झालेले आहे. पंतप्रधान नरेंद्र मोदी यांनी आज दुर्घटनाग्रस्त कुटुंबियांची भेट घेतली आणि परिस्थितीचा आढावा घेतला.

पंतप्रधानांच्या अध्यक्षतेखाली उच्चपदस्थ अधिकाऱ्यांची एक बैठक आज संपन्न झाली. यावेळी पंतप्रधानांनी अधिकाऱ्यांना सूचना केल्या आहेत. दुर्घटनाग्रस्त कुटुंबियांच्या संपर्कात राहा, त्यांना काय हवं नको ते बघा. शिवाय या घटनेची सखोल चौकशी करण्यासंबंधीचे मोदींनी अधिकाऱ्यांना निर्देश दिले.

आज (मंगळवारी) पंतप्रधान नरेंद्र मोदींनी मोरबी येथील जिल्हा रुग्णालयात जात जखमींच्या प्रकृतीची चौकशी केली. परिस्थितीचा आढावा घेऊन बचावकार्यामध्ये सहभागी अधिकारी-कर्मचाऱ्यांशी संवाद साधला. आयोजित बैठकीत मोदी म्हणाले की, या दुर्दैवी दुर्घटनेमुळे अनेक परिवार उघड्यावर आले आहेत. त्यांच्यासोबत राहाणं आपलं काम आहे. यावेळी अधिकाऱ्यांनी दुर्घटनाग्रस्त कुटुंबियांना देण्यात येणाऱ्या मदतीसंदर्भात माहिती दिली.

दरम्यान, आज अरविंद केजरीवाल यांनी भाजपवर गंभीर आरोप केलेले आहेत. पूल बनवणाऱ्या कंपनीकडून भाजपला फंडिंग होत होतं, हे खरं आहे का? असं केजरीवाल म्हणाले. राज्यात एवढी गंभीर दुर्घटना घडलेली असतांना मुख्यमंत्र्यांनी पदावर राहू नये, सरकारने पायउतार व्हावं, असंही आवाहन त्यांनी केलं.