नवी दिल्ली: कर्नाटकमधून सुरू झालेल्या हिजाब प्रकरणावर शेतकरी नेते राकेश टिकैत यांनी प्रथमच प्रतिक्रिया दिली असून हा वाद अनावश्यकरीत्या तापविला जात असल्याचे म्हटले आहे. हिजाब पेक्षा हिसाब कडे लक्ष द्यावे, अन्यथा देशाचे मोठे नुकसान होईल अशी टिप्पणी त्यांनी केली.

उत्तर प्रदेशसह पाचही राज्यांत निवडणूक प्रचारात याचा जोरदार वापर सुरू आहे. हा मुस्लिम समाजाचा अंतर्गत प्रश्न आहे व यात इतरांनी बोलू नये अशी टिकैत यांची भूमिका होती. सोमवारी त्यांनी ट्विट केले. ताज्या बँक घोटाळ्याचा संदर्भ देऊन त्यांनी म्हटले आहे की, की हिजाबावर नव्हे तर देशातील बॅंकांच्या हिशोब यावर आंदोलनाची आवश्यकता आहे. माझ्या प्रिय देशवासीयांनो, अशीच परिस्थिती राहिली तर देश विकला जाण्यास वेळ लागणार नाही. मात्र आम्ही असे कदापी होऊ देणार नाही.

पहिल्या टप्प्याच्या मतदानानंतर टिकैत यांनी, हिंदू-मुस्लिम राजकारणाचा काळ संपल्याचे भाकीत केले होते. बेलगाम सरकारांवर अंकुश ठेवणे व शेतकरी-गरीब व ग्रामीण जनतेबद्दलच्या द्वेषाच्या राजकारणावर मते पडत आहेत व हीच जनता यापुढेही तसेच मतदान करेल असाही विश्वास त्यांनी व्यक्त केला.