नवी दिल्ली : हिमाचल प्रदेश विधानसभा निवडणुकीसाठी (Himachal Pradesh Assembly Election) बंडखोरी करणाऱ्या नेत्यांवर भाजपनं कारवाई सुरू केलीय. राज्यातील सत्ताधारी भारतीय जनता पक्षानं (BJP) सोमवारी अपक्ष उमेदवार म्हणून निवडणूक लढविल्याबद्दल प्रदेश उपाध्यक्षांसह आपल्या पाच बंडखोर नेत्यांना पक्षाच्या प्राथमिक सदस्यत्वातून निलंबित केलंय.

निलंबित भाजप नेत्यांमध्ये माजी आमदार तेजवंत सिंह नेगी 'किन्नौर', किशोरी लाल 'अन्नी', मनोहर धीमन 'इंदोरा', के एल ठाकूर 'नालागढ' आणि पक्षाच्या हिमाचल प्रदेश युनिटचे उपाध्यक्ष कृपाल परमार यांचा समावेश आहे. या नेत्यांना भाजपनं तिकीट नाकारलं आहे. यानंतर हे सर्वजण आपापल्या जागेवरून अपक्ष म्हणून निवडणूक लढवत आहेत. माजी राज्यसभा सदस्य परमार हे फतेहपूर मतदारसंघातून अपक्ष उमेदवार म्हणून निवडणूक लढवत आहेत.

पक्षाच्या अधिकृत उमेदवाराविरुद्ध अपक्ष उमेदवार म्हणून निवडणूक लढवल्याबद्दल भाजपचे प्रदेशाध्यक्ष सुरेश कश्यप यांनी या नेत्यांना पक्षाच्या प्राथमिक सदस्यत्वातून सहा वर्षांसाठी निलंबित केलंय. यापूर्वी 12 हून अधिक भाजप नेत्यांनी 12 नोव्हेंबर रोजी होणाऱ्या विधानसभा निवडणुकीत अपक्ष उमेदवार म्हणून निवडणूक लढवणार असल्याचं जाहीर केलं होतं. मात्र, सर्वोच्च नेतृत्वाच्या मध्यस्थीनंतर माजी खासदार महेश्वर सिंह, युवराज कपूर आणि धर्मशाला ब्लॉक अध्यक्ष अनिल चौधरी यांनी अपक्ष म्हणून आपली नावं मागं घेतली आहेत.