देशातील १४ राज्यांत ३२ रिक्त जागांसाठी विधानसभा आणि लोकसभेच्या जागांवर पोटनिवडणुका पार पडल्या. यामध्ये आसाम, हिमाचल प्रदेश, महाराष्ट्र आणि दादरा नगर हवेली या प्रमुख राज्यांचा समावेश होता. त्यामध्ये आसाममध्ये भाजपने वर्चस्व मिळवलं आहे. यावरुनच आसामचे मुख्यमंत्री हिमंता बिस्व सर्मा यांनी भाजपला मिळालेल्या यशाबद्दल प्रतिक्रीया दिली आहे. यावेळी बोलताना त्यांनी भाजप हा आता पाच सहा राज्यांसाठी मर्यादित नसल्याचं सांगितलंय.

आसामचे मुख्यमंत्री हेमंत बिस्वा शर्मा यांनी भाजप हा पक्ष आता राष्ट्रीय पक्ष झाला असून, तो पाच सहा राज्यांसाठी मर्यादित राहिला नसल्याचं सांगितलं. तसेच भाजप कोणत्याही राज्यात निवडणुक जिंकण्यासाठी सक्षम झाला असल्याचं सांगितलं आहे. "आम्ही सर्व 5 जागा मोठ्या फरकाने जिंकल्या. आसाममधील आजचा निवडणूकीतील विजय हा काही सामान्य विजय नाही, कारण प्रत्येक जागेवर आपण सार्वत्रिक निवडणुकांपेक्षा जास्त फरकाने जिंकलो आहोत. ईशान्येतील लोकांनी पंतप्रधान मोदींच्या नेतृत्वावर विश्वास ठेवला आहे" अशी भावना देखील त्यांनी व्यक्त केली.