बिहारमधील (Bihar) नवाडा जिल्ह्यात (Nawada) तिहेरी हत्या झाल्याची धक्कादायक घटना समोर आलीय. ही घटना गोविंदपूर पोलीस स्टेशन (Govindpur Police Station) हद्दीमधील माधोपूर गावात (Madhopur Village) घडलीय. इथं एका पतीनं झोपडीत धारदार शस्त्रानं गळा चिरून पत्नी आणि दोन मुलींची निर्घृण हत्या केलीय. पोलिसांनी दिलेल्या माहितीनुसार, मृतांमध्ये सावित्री देवी आणि त्यांची 1 वर्षाची अल्पवयीन मुलगी काजल आणि 2 वर्षांची मुलगी दिव्या यांचा समावेश आहे. मात्र, ही घटना घडल्यानंतर आरोपी पती दीपक चौधरी यानं स्वत: गोविंदपूर पोलीस ठाणं गाठून आत्मसमर्पण केलंय.

मिळालेल्या अधिक माहितीनुसार, माधोपूर गावातील रहिवासी श्रवण चौधरी यांचा मुलगा दीपक कुमार यानं आपल्या 25 वर्षीय पत्नीची हत्या केलीय. या धक्कादायक घटनेची माहिती गावकऱ्यांनी पोलिसांना (Police) दिली. त्यानंतर पोलीस स्टेशनचे प्रभारी डॉ. नरेंद्र प्रसाद आपल्या पोलीस पथकासह घटनास्थळी पोहोचले. पोलिसांनी मृतदेह ताब्यात घेतला असून सध्या आरोपीकडून खुनाच्या कारणांचा शोध सुरुय.

घटनेच्या संदर्भात गावकऱ्यांनी सांगितलं की, दीपक कुमारची मानसिक स्थिती ठीक नाहीय. गेल्या एक वर्षापासून त्याच्यावर रांचीमध्ये उपचार सुरू आहेत. मानसिक स्थिती बिघडल्यानं त्यानं पत्नी व मुलांची हत्या केलीय. मात्र, दीपक घरातील सदस्यांनाही मारहाण करायचा, असं त्यांनी नमूद केलंय. या हत्येनंतर अटक करण्यात आलेल्या पतीनं आतापर्यंत पोलिसांना काहीही सांगितलं नाहीय.