पाटना : लिंबाच्या किंमती वाढल्यामुळे लिंबू चोरीच्या घटना घडत आहेत. मात्र, आता लिंबावरून खुनाची घटना घडल्याचे देखील समोर आले आहे. लिंबू तोडल्याच्या रागातून सासू आणि पतीच्या बहिणींनी सूनेचा गळा आवळून खून केला आहे. बिहारच्या (Bihar) पूर्व चंपारण जिल्ह्यातील छाउदादनो पोलिस ठाण्याच्या हद्दीतील चैनपूर गावात घडली.

काजल देवी (२८), असे या मृत महिलेचे नाव आहे. चैनपूर गावातील रहिवासी सुनील बैठा यांच्या त्या पत्नी आहेत. मृत महिलेचा पती आणि सासरे दोघेही कामानिमित्त दुसऱ्या राज्यात राहतात. लिंबू तोडण्यावरून सासू आणि सूनेमध्ये वाद झाला. त्यानंतर दोन्ही नणंद देखील आपल्या आईच्या मदतीला धावून आल्या. वाद इतका टोकाला पोहोचला की, सासूने सुनेची हत्या केली. सुनेच्या डोक्यावर आणि मानेवर दोरीच्या खुणा आढळून आल्या आहेत, असं पोलिसांनी सांगितलं.

शेजाऱ्यांनी घटनेची माहिती पोलिसांना दिली. माहिती मिळताच पोलिस घटनास्थळी पोहोचले. त्यानंतर घटनेचा पंचनामा करून मृतदेह शवविच्छेदनासाठी पाठवला. त्यामध्ये महिलेचा गळा आवळून खून केल्याचे स्पष्ट झाले आहे. सध्या आरोपी सासू आणि दोन्ही नणंद फरार आहेत. पोलिस आरोपींचा शोध घेत आहेत, असं छाउदादनोचे पोलिस अधिकारी मनोज कुमार सिंह यांनी सांगितलं.