आज देश आपला अमृत महोत्सवी स्वातंत्र्यदिन साजरा करत आहे. यंदाच्या स्वातंत्र्य दिनाच्या या खास गोष्टी असणार आहेत. यंदाच्या स्वातंत्र्य दिनाची थीम 'एक भारत, श्रेष्ठ भारत' आहे.

प्रथमच 21 तोफांची सलामी

देशात अमृतमहोत्सवी स्वातंत्र्यदिनाच्या निमित्ताने पंतप्रधान नरेंद्र मोदी आज विविध कार्यक्रमांची घोषणा करण्याची शक्यता आहे. या स्वातंत्र्यदिनानिमित्त सरकारने ‘हर घर तिरंगा’ या उपक्रमाची घोषणा केली असून देशवासियांचा त्याला चांगला प्रतिसाद मिळत आहे. या स्वातंत्र्यदिनाच्या कार्यक्रमाचे आणखी एक वैशिष्ट्य म्हणजे पहिल्यांदाच स्वदेशी तोफेच्या सहाय्याने 21 तोफांची सलामी देण्यात येणार आहे.

स्वातंत्र्यदिनानिमित्त देशभर उत्साह, प्रभात फेरी निघणार

देशात आज अमृत महोत्सवी स्वातंत्र्यदिन साजरा करण्यात येत असून त्यानिमित्ताने देशभरात उत्साह आहे. राज्यातील त्या-त्या राजधानीच्या ठिकाणी संबंधित मुख्यमंत्र्यांच्या हस्ते ध्वजवंदन पार पडणार आहे. तर देशाच्या विविध ठिकाणी आज विद्यार्थी आणि तरुणांकडून प्रभात फेरीचे आयोजन करण्यात येत आहे. तसेच आज दिवसभर विविध कार्यक्रमांचे आयोजन करण्यात आलं आहे.

14 देशांतील एनसीसी कॅडेटही सहभागी होणार

यंदा 14 देशांतील निवडक NCC कॅडेट समारंभात सहभागी होणार आहेत. या वर्षी लाल किल्ल्यावर होणाऱ्या स्वातंत्र्यदिनाच्या कार्यक्रमात 14 देशांतील सुमारे 126 तरुण कॅडेट्स सहभागी होणार आहेत. मॉरिशस, अर्जेंटिना, ब्राझील, किर्गिझस्तान, उझबेकिस्तान, संयुक्त अरब अमिराती, इंग्लंड, अमेरिका, मालदीव, नायजेरिया, फिजी, इंडोनेशिया, सेशेल्स आणि मोझांबिक या देशांचे कॅडेट भारतात पोहोचले आहेत. या परदेशी कॅडेट्सने आपापल्या देशात आयोजित केलेल्या स्पर्धेत भाग घेतला असून त्यात निवड झाल्यानंतर हे एनसीसी कॅडेट्स भारतात आले आहेत. कॅडेट कल्चर एक्सचेंज प्रोग्राम अंतर्गत एनसीसी कॅडेट्सशी संवाद साधण्यासाठी भारतात आले आहेत.