नवी दिल्ली - काँग्रेस नेते राहुल गांधी यांच्यावर विरोधी पक्षनेतेपदाची जबाबदारी घेण्यासाठी पक्षांतर्गत व ‘इंडिया’ आघाडीच्या नेत्यांकडूनही दबाव वाढू लागला आहे. राहुल गांधी यांनीच विरोधी पक्षनेतेपद स्वीकारावे, असा आग्रह ‘इंडिया’ आघाडीच्या नेत्यांकडून केला जात आहे.

येत्या २४ जूनपासून संसदेचे अधिवेशन सुरू होत आहे. यात २४ व २५ जूनला नवनिर्वाचित खासदारांचा शपथविधी होईल. २६ जूनला नव्या लोकसभा अध्यक्षांची निवड होण्याची शक्यता आहे. यानंतर विरोधी पक्षनेतेपदासाठी उमेदवाराचे नाव द्यावे लागणार आहे. विरोधी पक्षनेतेपदासाठी किमान ५५ खासदार एका पक्षाचे पाहिजे.

दहा वर्षानंतर काँग्रेसचे लोकसभेतील संख्याबळ ९९ असल्याने आता या पक्षाला विरोधी पक्षनेतेपदावर दावा करता येणार आहे. या संवैधानिक पदावर काँग्रेसने राहुल गांधी यांची निवड व्हावी, अशी मागणी काँग्रेसच्या खासदारांनी आधीच केली आहे. काँग्रेसच्या संसदीय दलाच्या बैठकीत राहुल गांधी यांच्या नावाचा आग्रह धरण्यात आला.

आता मात्र ‘इंडिया’ आघाडीच्या घटक पक्षांकडून सुद्धा राहुल गांधी यांच्या नावाला दबाव वाढू लागला आहे. लोकसभा निवडणुकीनंतर ‘इंडिया’ आघाडीच्या नेत्यांच्या बैठकीत सुद्धा विरोधी पक्षनेतेपद राहुल गांधी यांनी स्वीकारावे, याचा आग्रह धरला गेला. शिवसेना (उद्धव बाळासाहेब ठाकरे), राष्ट्रवादी काँग्रेस (शरदचंद्र पवार) पक्ष, कम्युनिस्ट पार्टी, राजद या पक्षांनी राहुल गांधी यांच्या नावाचे समर्थन केल्याचे समजते.

यामुळे राहुल गांधी यांच्यावर दबाव वाढत आहे. यावेळी लोकसभेत २४० विरोधी पक्षांचे सदस्य असल्याने मजबूत विरोधी पक्षाचे नेतृत्व राहुल गांधी यांनी करावे, असे बोलले जात आहे. यावर आता काँग्रेसमध्ये गांभीर्याने चर्चा सुरू असून राहुल गांधी हे पद स्वीकारण्याची शक्यता बळावली असल्याचे काँग्रेसच्या सूत्रांनी सांगितले.