नवी दिल्लीः इंडिया आघाडीकडून अद्याप पंतप्रधान पदाच्या उमेदवाराची घोषणा करण्यात आलेली नाहीये. नितीश कुमार यांचंही नाव पंतप्रधानपदासाठी चर्चेत असतं. परंतु आता एका मोठ्या नेत्याने त्यांचं नाव जाहीर होणार असल्याचं म्हटलं आहे.

जनता दल युनायटेड पक्षाच्या मोठ्या नेत्याने दावा केलाय की, मुख्यमंत्री नितीश कुमार यांच्यामध्ये पंतप्रधान पदासाठी आवश्यक असणारे सगळे गुण आहेत. जेव्हा इंडिया आघाडीकडून पंतप्रधान पदाची घोषणा होईल तेव्हा ते नितीश कुमार यांचंच नाव असेल असं माहेश्वर हजारी यांनी म्हटलं आहे.

माहेश्वर हजारी हे बिहार विधानसभेचे उपाध्यक्ष आहेत. त्यांच्या विधानामुळे इंडिया आघाडीत बिघाडी होणार की खरंच नितीश कुमार यांचं नाव पंतप्रधान पदासाठी जाहीर होणार? असा प्रश्न उपस्थित होतोय.

माहेश्वर हजारी पुढे म्हणाले की, मुख्यमंत्री नितीश कुमार यांच्यामध्ये पंतप्रधान होण्यासाठी आवश्यक गुण आहेत. त्याच्यापेक्षा वरचढ नेता इंडिया आघाडीमध्ये नाही. त्यामुळे पंतप्रधान पदाचं नाव जाहीर होईल तेव्हा ते नितीश कुमार यांचंच असेल.

जेडीयूच्या सर्व आघाड्यांची बैठक नितीश कुमार यांच्या उपस्थितीमध्ये संपन्न झाली, त्यानंतर हजारी यांनी हे विधान केलं.

''नितीश कुमार हे देशातले सर्वात मोठे समाजवादी नेते आहेत. स्वतः पंतप्रधान नरेंद्र मोदी यांनीही म्हटलं होतं की, राम मनोहर लोहिया आणि जेपी यांच्यानंतर नितीश कुमार मोठे समाजवादी नेते आहेत. ते पाच वर्षे भारत सरकारमध्ये मंत्री राहिलेले आहेत आणि १८ वर्षे बिहारचे मुख्यमंत्री आहेत. त्यांच्यापेक्षा योग्यता असलेला दुसरा नेता नाही'' असं माहेश्वरी म्हणाले.

इंडिया आघाडीची एकजुट खऱ्या अर्थाने नितीश कुमार यांनी केली. त्यामुळे आज नाही तर उद्या त्यांच्या उमेदवारीची घोषणा इंडिया आघाडीकडून झाल्याशिवाय राहणार नाही, अशी पुष्टी माहेश्वर हजारी यांनी दिली. 'आज तक'ने हे वृत्त दिले आहे.