नवी दिल्ली - कोरोनाला रोखण्यासाठी जगभरात लसीकरण मोहिम सुरु आहे. जगात चीननंतर सर्वात मोठी लसीकरण मोहिम भारतात सुरु आहे. जानेवारीमध्ये लसीकरणाला सुरुवात झाल्यानंतर आता १०० कोटींचा टप्पा आज ओलांडला आहे. केंद्र सरकारने हे एक मोठं यश असल्याचं म्हटलं आहे. निति आय़ोगाचे सदस्य डॉक्टर व्ही के पॉल यांनी देशातील नागरिकांचे आणि आरोग्य कर्मचाऱ्यांचे अभिनंदन केले आहे.

व्ही के पॉल यांनी म्हटलं की, एखाद्या देशाने १०० कोटी डोस ९ महिन्यात पूर्ण करणं हे मोठं काम आहे, देशाचं मोठं यश आहे. देशात जानेवारीमध्ये ९ महिन्यांपूर्वी लसीकरणाला सुरुवात झाली होती आणि त्यानंतर कमी कालावधीतच देशाने हा टप्पा पार केला.

भारतातील ३० टक्के नागरिकांना दोन्ही डोस देण्यात आले आहेत. तर १० कोटी व्यक्तींना एक डोस देण्यात आला असून दुसरा डोस अद्याप घेतलेला नाही. हे काम अजून पूर्ण झालेलं नाही. दुसरा डोस घेण्यासाठी त्यांना रिमांइंडर पाठवण्यात आले असल्याची माहितीही डॉक्टर व्हीके पॉल यांनी दिली.

भारताची ओळख ही आत्मनिर्भर अशी असून देशात लस तयार करून १०० कोटी डोस देण्यात आले आहेत. यामध्ये आरोग्य कर्मचाऱ्यांनी यासाठी प्रचंड मेहनत घेतली आहे. तसंच पंतप्रधान मोदींनीसुद्धा यासाठी मार्गदर्शन केलं आणि पालकांप्रमाणे काळजी घेतली असं केंद्रीय आरोग्य राज्यमंत्री भारती पवार यांनी म्हटलं.

केंद्र सरकारनं याचं सेलिब्रेशन करण्याचं नियोजन केलं आहे. यानिमित्त लसीकरण मोहिमेवर एक नवं गीत आणि ऑडिओ व्हिज्युअल फिल्मचं प्रकाशन होणार आहे. राजधानी दिल्लीतील लाल किल्ल्यावर हा कार्यक्रम पार पडणार आहे. केंद्रीय आरोग्य मंत्री मनसुख मांडवीय यांच्या हस्ते हे प्रकाशन होणार आहे.