नवी दिल्ली : संरक्षण क्षेत्रामध्ये गेल्या काही वर्षांमध्ये मोठ्या प्रमाणावर सुधारणा झाली आहे. युद्धसामग्री आणि संरक्षणविषयक सामग्रीही मोठ्या प्रमाणावर तंत्रज्ञानावर आधारित आहे. एकीकडे युद्धतंत्र अधिकाधिक तंत्रज्ञानाभिमुख होत चाललेलं असताना अखंड आणि सुरक्षितरित्या कम्यूनिकेशन होणं, हेही महत्त्वाचं आहे. त्यामुळेच येत्या दोन-तीन वर्षांमध्ये अनेक उपग्रह अवकाशात सोडण्याचं उद्दीष्ट भारतानं ठेवलं असल्याची माहिती संरक्षण आणि सुरक्षा यंत्रणेतील सूत्रांनी दिली आहे. (Satellite)

हे उपग्रह केवळ कम्यूनिकेशनसाठी नसतील तर ते भारताच्या सीमांवर चोवीस तास देखरेख देखील करणार आहेत. सध्या याच गोष्टीची देशात कमतरता आहे, असंही सूत्रांनी सांगितलंय. काल मंगळवारी संरक्षण मंत्री राजनाथ सिंह यांच्या अध्यक्षतेखालील प्रमुख खरेदी समिती म्हणजेच Defence Acquisition Council - DAC ने स्वदेशी पद्धतीने डिझाईन आणि विकसित केलेल्या GSAT 7B साठी आवश्यकता मान्य केली आहे.

या उपग्रहाचं प्रक्षेपण झाल्यानंतर हा लष्कराचा पहिला असा कम्यूनिकेशन सॅटेलाईट असेल जो फोर्स मल्टीप्लायर म्हणून कार्य करेल युद्ध परिस्थितीमध्ये त्याचा खूप फायदा होईल. सूत्रांनी दिलेल्या माहितीनुसार, GSAT 7B सॅटेलाईटची मागणी आर्मीकडून गेल्या अनेक वर्षांपासून करण्यात येत होती. हे सॅटेलाईट येत्या दोन-तीन वर्षांमध्ये लाँच करण्यात येणार आहे. या सॅटेलाईटमुळे कम्युनिकेशन होणं सहज सोपं होणार आहे. नेव्ही आणि एअरफोर्स यांच्यामधीलही कम्युनिकेशन सोपं होणार आहे.