नवी दिल्ली : जगभरात कोरोनाग्रस्त रुग्णांची संख्या दिवसेंदिवस वाढत आहे. तसेच यातील मृतांचा आकडाही जास्त आहे. भारतातही कोरोनाबाधित रुग्णांची संख्या मोठी आहे. देशभरात कोरोनाग्रस्त रुग्णांची संख्या पाच लाखपेक्षाही जास्त झाली आहे. तर यातील दिलासादायक बाब म्हणजे बरे होणाऱ्या रुग्णांचे प्रमाणही मोठे आहे. सध्या देशात रिकव्हरी रेट 58 टक्के असल्याची माहिती केंद्रीय आरोग्यमंत्री डॉ. हर्षवर्धन यांनी दिली. 

ताज्या बातम्यांसाठी डाऊनलोड करा ई-सकाळचे ऍप   

भारतात कोरोनाचा संसर्ग मोठ्या प्रमाणात होत आहे. रुग्णांची संख्याही वाढतच जात आहे. पण दुसरीकडे बरे होणाऱ्या रुग्णांची संख्या वाढली आहे. आत्तापर्यंत 3 लाखपेक्षाही जास्त रुग्ण बरे होऊन घरी परतले आहेत. तर देशातील कोरोनाबाधित रुग्णांचा मृत्यूदर 3 टक्के आहे. हा दर अत्यंत कमी आहे, असेही हर्षवर्धन यांनी सांगितले.

याशिवाय रुग्णांची संख्या दुप्पट होण्याचे प्रमाण 19 दिवसांवर पोहोचली आहे. मात्र, लॉकडाऊनपूर्वी हे प्रमाण 3 दिवसांवर होते, असेही हर्षवर्धन म्हणाले. 

भारतात रुग्णांची संख्या 5 लाखांवर...

भारतात सध्या 5,10,672 कोरोनाग्रस्त रुग्ण आहेत. यापैकी 2,96,376 रुग्णांना रुग्णालयातून डिस्चार्ज देण्यात आला आहे. तर सध्या 1,98,584 ऍक्टिव्ह रुग्ण आहेत. आत्तापर्यंत देशभरात 15,712 कोरोनाबाधितांचा मृत्यू झाला आहे. 

बरे होणाऱ्या रुग्णांचे प्रमाण वाढतेय

देशात कोरोना रुग्ण बरे होण्याचे प्रमाण हे वेगाने वाढत आहे. ही बाब भारतासाठी चांगलीच आहे. मागील 24 तासांमध्ये कोरोनाचे 10,245 रुग्ण बरे होऊन घरी परतले आहेत. आत्तापर्यंत 3 लाखांच्या आसपास रुग्ण देशभरात बरे झाले आहेत, अशीही माहिती हर्षवर्धन यांनी दिली.

डॉ. हर्षवर्धन यांच्या अध्यक्षतेखाली बैठक

कोरोना व्हायरसच्या पार्श्वभूमीवर डॉ. हर्षवर्धन यांच्या अध्यक्षतेखाली मंत्र्यांच्या गटाची बैठकीचे आयोजन करण्यात आले होते. त्यांची ही बैठक व्हिडिओ कॉन्फरन्सिंगच्या माध्यमातून पार पडली. या बैठकीला परराष्ट्रमंत्री एस. जयशंकर आणि हवाई वाहतूक मंत्री हरदीप सिंग पुरी हेदेखील या बैठकीला उपस्थित होते.