देशात कोरोना विषाणूनं (Coronavirus) पुन्हा थैमान घालायला सुरुवात केली आहे. गेल्या 24 तासांत देशात 7,830 नवे रुग्ण आढळून आले आहेत. यामुळं सक्रिय रुग्णांची संख्या 40,215 वर पोहोचली असल्याची माहिती केंद्रीय आरोग्य मंत्रालयानं (Union Ministry of Health) दिली आहे.

देशात कोरोनाच्या वाढत्या रुग्णसंख्येनं धास्ती वाढली आहे. याआधीच्या दिवशी कोरोनाचे 5,676 रुग्ण आढ‍ळून आले होते. तर, याआधी देशात कोरोनाचे 5,880 रुग्णांची नोंद झाली होती. देशात रविवारी संपलेल्या मागील आठवड्यात कोरोना रुग्णसंख्येत 79 टक्के वाढ दिसून आली. गेल्या आठवड्यात 36 हजार रुग्णांची नोंद झाली.

तर, महाराष्ट्रात मंगळवारी कोरोनाचे 919 नवे रुग्ण आढळून आले आणि एका रुग्णाचा मृत्यू झाला. यात मुंबईतील 242, नागपुरातील 105, पुणे 58, नवी मुंबईतील 57 रुग्णांचा समावेश असल्याचं आरोग्य विभागानं जारी केलेल्या बुलेटिनमध्ये म्हटलं आहे. राज्यातील एकमेव कोविड-19 मृत्यूची नोंद अकोला शहरात झालीये.