नवी दिल्ली : सरकार लॅपटॉप आणि इतर उपकरणे आयातीकरिता आवश्यक परवान्यांसाठी अर्ज करण्यासाठी कंपन्यांना अधिक वेळ देण्याची शक्यता आहे, असे माहिती तंत्रज्ञान मंत्रालयाच्या सूत्रांनी म्हटले आहे.

कदाचित एक महिना किंवा त्यापेक्षा जास्त मुदतवाढ दिली जाण्याची शक्यता असून, याबाबत डीजीएफटीची अधिसूनचना लवकरच अपेक्षित आहे, असेही सूत्रांनी सांगितले. लॅपटॉप, टॅब्लेट आणि विशिष्ट प्रकारच्या संगणकांवर आयात निर्बंध लादण्याची आणि वैध परवान्यांमधूनच त्यांची आयात करण्याची परवानगी देण्याच्या सरकारच्या निर्णयामुळे या क्षेत्रातील कंपन्यांमध्ये खळबळ माजली होती.

त्यांनतर आज हा खुलासा करण्यात आला आहे. कंपन्यांना परवान्यासाठी अर्ज करण्यासाठी पुरेसा वेळ दिला जाईल आणि आयातीत कोणतीही समस्या येणार नाही याची खात्री देण्याचा प्रयत्न केला जाईल,असेही सूत्रांनी सांगितले.

सुरक्षेच्या दृष्टिकोनातून तसेच देशांतर्गत उत्पादनाला चालना देण्याच्या उद्देशाने सरकारने लॅपटॉप आदी उत्पादनांच्या आयातीवर काल तत्काळ प्रभावाने निर्बंध लागू केले आहेत. या निर्बंधामुळे उत्पादने जिथून येत आहेत त्या ठिकाणांवर बारीक नजर ठेवता येईल, असेही माहिती तंत्रज्ञान मंत्रालयाच्या सूत्रांनी सांगितले.

तंत्रज्ञान कंपन्यांनी थांबवली आयात

अॅपल, सॅमसंग, एचसीएल आदी कंपन्यांनी भारतात करण्यात येणारी लॅपटॉप आणि टॅब्लेटची आयात थांबवली आहे. सरकारने गुरुवारी (ता. ३) छोट्या टॅब्लेटपासून ऑल-इन-वन पीसीपर्यंत काही इलेक्ट्रॉनिक्स उपकरणे आयात करण्यासाठी परवाना अनिवार्य केला. त्यामुळे या कंपन्यांनी आयात थांबवण्याचा निर्णय घेतला.

आता भारतात शाळा, महाविद्यालये सुरू झाली असून, सणासुदीचा खरेदीचा हंगामही जवळ आल्याने या उपकरणांची खरेदी वाढणार आहे. अशावेळी परवाने मिळण्यास किती वेळ लागेल हे अस्पष्ट आहे. त्यामुळे अब्जावधी-डॉलरच्या व्यापारात व्यत्यय येत आहे, असे या कंपन्यांनी म्हटले आहे.