मुंबई - India vs Bharat इंडिया विरुद्ध भारत वादावरुन देशात राजकीय संघर्ष पेटला आहे. आता बहुजन समाज पक्ष आणि यूपीच्या माजी मुख्यमंत्री मायावती यांनी या मुद्द्यावर प्रतिक्रिया दिली आहे. त्यांनी लखनौ येथे पत्रकार परिषदेत सांगितले की, भारत म्हणजे इंडिया हे देशाचे सर्वांना परिचीत असलेले प्रतिष्ठित आणि घटनात्मक नाव आहे. त्यामुळे देशाच्या नावाशी छेडछाड करणे अत्यंत अन्यायकारक असल्याचं मायावती यांनी म्हटलं.

प्रसारमाध्यमांशी बोलताना मायावती म्हणाल्या की, विरोधी पक्षानेच आपल्या युतीचे इंडिया हे नाव देऊन भाजपला देशाच्या नावावर संविधानाशी छेडछाड करण्याची संधी दिली आहे. सत्ताधारी आणि विरोधकांच्या संगनमताने सर्व काही घडत असल्याची, शक्यता मायावती यांनी व्यक्त केली.

मायावती पुढे म्हणाल्या की, निवडणुकीपूर्वी भारतविरुद्ध इंडिया असे राजकारण करण्याचा काँग्रेस आणि भाजपचा खेळ लोकांना समजतोय. यातून गरिबी, महागाई, बेरोजगारी, विकास या महत्त्वाच्या मुद्द्यांना बगल दिली आहे. त्यामुळे या दोन्ही आघाड्यांपासून अंतर राखणे आपल्यासाठी आवश्यक आणि जनहिताचे आहे.

विरोधकांच्या आघाडीला देण्यात आलेल्या इंडिया नावाविरोधात भाजप सरकारने सर्वोच्च न्यायालयात जायला हवं होतं. या प्रकरणी कायदा करून इंडिया हे नाव देण्यावर बंदी घालायला हवी होती. आता याबाबत जे संकुचित राजकारण केले जात आहे, तेही लोकविरोधी आहे. अशा स्थितीत सर्वोच्च न्यायालयाने स्वतः याची दखल घेऊन देशाच्या नावाने खास तयार झालेल्या संघटना, पक्ष आणि आघाड्यांवर तात्काळ बंदी घालावी, अशी आमची मागणी असल्याचं मायावती यांनी म्हटलं.