MiG-21 Crashed : भारतीय हवाई दलाचे मिग-२१ लढाऊ विमान सोमवारी (८ मे) सकाळी राजस्थानमधील हनुमानगडजवळ कोसळले. सुरतगड येथून विमानाने उड्डाण केले होते. वैमानिकाने पॅराशूटच्या मदतीने विमानातून उडी घेत आपला जीव वाचवला. मात्र, विमान एका घरावर कोसळले, परिणामी एक महिला आणि एका पुरुषाचा मृत्यू झाला. सध्या हवाई दलाकडून याबाबत कोणतीही माहिती देण्यात आलेली नाहीये.

या घटनेबाबत स्थानिक पोलीसांनी माहिती दिली की, या दुर्घटनेनंतर पायलटला एअरलिफ्ट करण्यात आले आहे. वैमानिकासाठी हवाई दलाचे Mi 17 पाठवण्यात आले आहे. मिग-२१ ज्या छतावर पडले त्या छतावर तीन महिला आणि एक पुरुष होते. यामध्ये एका महिला आणि एका पुरुषाचा मृत्यू झाला. त्याचवेळी दोन महिलांना रुग्णालयात नेण्यात येत आहे.