नवी दिल्ली : बंदूक हाती घेऊन देशाच्या सीमांचे संरक्षण करणारी ‘ती’ आता युद्धनौकांवर देखील आपल्या शौर्याचे कसब दाखविण्यासाठी सज्ज झाली आहे. भारतीय नौदलाच्या अनेक मोठ्या युद्धनौकांवर महिला अधिकाऱ्यांची नियुक्ती करण्यात आल्याची घोषणा नौदलाचे प्रमुख ॲडमिरल आर. हरीकुमार यांनी केली आहे.

नौदलाच्या पंधरा मोठ्या युद्धनौकांवर २८ महिला अधिकाऱ्यांना तैनात करण्यात आले असून ही संख्या आणखी वाढत जाणार आहे. येथे पत्रकार परिषदेत बोलताना हरीकुमार म्हणाले की,‘‘ महिला अधिकाऱ्यांच्या खांद्यावर मोठी जबाबदारी सोपविण्यास नौदल सज्ज आहे. भारत सरकारप्रमाणेच नौदलाचे ध्येय देखील महिलांचे सक्षमीकरण करणे हे आहे. महिलांना अतिरिक्त संधी मिळावी म्हणून आम्ही विविध उपाययोजना आखल्या आहेत. आता जवळपास सर्व मोठ्या युद्धनौकांवर महिला अधिकाऱ्यांची नेमणूक करण्यात आली आहे.’’ नौदलातील माहिती आणि तंत्रज्ञान विभागामध्ये पुढील वर्षी जून महिन्यापासून महिला अधिकाऱ्यांची भरती करण्यात येईल, असेही त्यांनी नमूद केले. विनाशिका, गायडेड क्षेपणास्त्रांना नेस्तनाबूत करणारी यंत्रणा आणि टॅंकर यांचे नेतृत्व महिला अधिकारी करतील.

‘विक्रांत’वरही ‘तिचे’ पाऊल

पुढील वर्षी ऑगस्ट महिन्यामध्ये भारताची पहिली स्वदेशी बनावटीची विमानवाहू युद्धनौका ‘विक्रांत’ वर देखील महिला अधिकाऱ्यांची नियुक्ती करण्यात येईल. तब्बल चाळीस हजार टन एवढे या युद्धनौकेचे वजन असून तिच्या बांधणीसाठी २३ हजार कोटी रुपये खर्च करण्यात आले आहेत. विशेष म्हणजे मागील वर्षी सप्टेंबर महिन्यामध्येच युद्धनौकांवरील विमानांचे उड्डाण हाताळण्यासाठी दोन महिला अधिकाऱ्यांची नियुक्ती करण्याचा निर्णय घेण्यात आला होता.

"राष्ट्रीय संरक्षण प्रबोधिनीमध्ये (एनडीए) कॅडेट म्हणूनच प्रवेश केल्यानंतर महिला उमेदवारांना योग्य ते प्रशिक्षण देण्यात येईल त्यासाठी प्राथमिक तत्त्वे निश्चित करण्यासाठी युद्धपातळीवर सुरू आहेत."

-ॲडमिरल आर. हरीकुमार, नौदलाचे प्रमुख