नाशिक : भारतीय रेल्वेने (Indian Railway) देशातील सहा हजार स्थानकांत वाय-फाय यंत्रणा (WiFI system) कार्यान्वित केली आहे. प्रवाशांच्या सुविधेत भर टाकण्यासाठी पाच वर्षांत रेल्वेने हे काम केले आहे. त्यात महाराष्ट्रातील ५५० रेल्वेस्थानकांचा समावेश आहे. प्रवासी आणि सर्वसामान्यांना डिजिटल व्यवस्थेशी जुळवून घेता यावे म्हणून रेल्वे दुर्गम स्थानकात ही सुविधा देणार आहे. (Indian Railway free wifi railway stations)

महाराष्ट्रातील ५५० स्थानकांचा समावेश

मुंबई येथे जानेवारी २०१६ मध्ये वाय-फाय उपक्रमाची सुरवात झाली. पश्‍चिम बंगालमधील मिदनापूर हे वाय-फाय सुविधा मिळविणारे पाच हजारावे, तर झारखंडमधील हजारीबाग सहा हजारावे स्थानक ठरले. रविवारी (ता.१६) ओडिशातील जरपदा स्थानकात ही सुविधा कार्यान्वित करण्यात आली.

सुविधा ही कायमस्वरूपी

वाय-फाय सुविधा कार्यान्वित झालेल्या काही राज्यांमधील स्थानकांची संख्या अशी : आंध्र प्रदेश ५०९, आसाम २२२, बिहार ३८४, छत्तीसगड ११५, दिल्ली २७, गुजरात ३२०, कर्नाटक ३३५, मध्य प्रदेश ३९३, तमिळनाडू ४१८, उत्तर प्रदेश ७६२, पश्‍चिम बंगाल ४९८. रेल्वेस्थानकातील वाय-फाय सेवेमुळे केंद्र सरकारच्या ‘डिजिटल इंडिया’ या महत्त्वाकांक्षी कार्यक्रमाचे लक्ष्य गाठणे सोपे झाले आहे. रेल्वेस्थानकातील वाय-फाय सुविधा ही कायमस्वरूपी असून, त्याचा कोणताही आर्थिक भार रेल्वेवर पडत नाही. रेल्वे मंत्रालयाच्या अखत्यारीतील रेलटेल या सार्वजनिक सेवा उपक्रमाच्या मदतीने ही सुविधा दिली जात आहे. गुगल, यूएसओफच्या अखत्यारीतील दूरसंचार विभाग, पीजीसीआयएल व टाटा ट्रस्टच्या सहभागातून हे काम पूर्ण केले जात आहे.