मुंबई : देशात आत्मनिर्भर भारत मोहिमेचे वारे वाहत आहेत. त्या धर्तीवर भारतीय रेल्वेमधील (Indian Railway) जास्तीत जास्त ट्रेन स्वदेशी बनावटीच्या करण्याची रेल्वे मंत्रालयाची योजना (Railway ministry scheme) आहे. त्यानुसार सेमी हायस्पीड वंदे भारत ट्रेन (Vande bharat express) वाढविण्यात येत आहेत. देशातील वेगवेगळ्या भागांतून येत्या ऑगस्ट-सप्टेंबर महिन्यात (starts from august - September) नव्या ७५ ट्रेन धावण्याचे नियोजन करण्यात आले आहे.

यंदाच्या अर्थसंकल्पात केंद्रीय अर्थमंत्री निर्मला सीतारामन यांनी पुढील तीन वर्षांत चारशे वंदे भारत ट्रेन चालविण्यात येण्याची घोषणा केली. त्याशिवाय १०० पीएम गती शक्ती कार्गो टर्मिनल विकसित केले जाणार आहेत. त्यामुळे तीन वर्षांत विविध मार्गांवर ताशी १८० ते २०० किमी वेगाने धावणाऱ्या वंदे भारत ट्रेन चालविण्यात येणार आहेत. दरम्यान, देशातील सर्व भागांत अशा ट्रेनची सेवा मिळणार आहे. मार्ग आणि वेळापत्रकाला लवकरच अंतिम रूप दिले जाणार आहे. सध्या अशा ट्रेनची निर्मिती रेल्वेच्या चेन्नईमधील इंटिग्रल कोच फॅक्टरीमध्ये सुरू आहे. ऑगस्ट-सप्टेंबरमध्ये ट्रेन सुरू करण्याचे नियोजन असल्याचे रेल्वेमंत्री आश्विन वैष्णव यांनी नुकतेच एका कार्यक्रमादरम्यान सांगितले.

केंद्र सरकारच्या ‘मेक इन इंडिया’ उपक्रमाअंतर्गत १८ महिन्यांच्या कालावधीत १०० कोटी रुपये खर्चून वंदे भारत ट्रेनची संकल्पना, विकास आणि निर्मिती केली गेली. फेब्रुवारी २०१९ मध्ये पहिली वंदे भारत ट्रेन नवी दिल्ली ते वाराणसीदरम्यान धावली.

‘वंदे भारत ट्रेन’ची वैशिष्ट्ये

- रिक्लाइनिंग आसने, जीवाणूमुक्त वातानुकूलित यंत्रणा आणि पुशबॅक सुविधा
- ट्रेनच्या तापमानापासून प्रत्येक इलेक्ट्रिक बोर्डपर्यंत सर्व आवश्यक यंत्रणांचे निरीक्षण करण्यासाठी एक केंद्रीकृत कोच
- प्रत्येक डब्यात चार आपत्कालीन खिडक्या
- ट्रेनमध्ये पावसाळा आणि पूरसदृश परिस्थितीसाठी खास रचना असलेली उपकरणे
- प्रत्येक डब्यात खास मोठे दिवे असतील जे दीर्घकाळ टिकतील
- वीज खंडित झाल्यास तीन तास व्हेंटिलेशन उपलब्ध.