नवी दिल्ली : भारत सरकारने तब्बल दोन वर्षाच्या कोरोना काळानंतर भारतीय विद्यार्थांना चीनला जाण्याची परवानगी दिली आहे. भारतीय विद्यार्थी आता चीनमध्ये सशर्त परत येऊन त्यांचे अपूर्ण राहिलेले शिक्षण पूर्ण करु शकतात असं चीनमधील भारतीय दूतावासाने सांगितलं आहे. चीनमध्ये शिक्षण घेणाऱ्या भारतीय विद्यार्थ्यांना कोरोनामुळे परत यावं लागलं होतं.

भारताचे परराष्ट्रमंत्री एस. जयशंकर यांनी चीनचे परराष्ट्रमंत्री वांग यी यांच्याशी २५ मार्च रोजी बैठक घेतली होती. त्या बैठकीनंतर भारतीय विद्यार्थ्यांना चीनमध्ये परत येण्यासाठी विचार करण्याची तयारी असल्याचं चीनच्या बाजूने सांगण्यात आलं होतं. दरम्यान आता हा निर्णय घेण्यात आला असून भारतीय विद्यार्थ्यांना 8 मे पर्यंत फॉर्म भरून माहिती देण्याची विनंती भारतातील चीनमधील दुतावासाने दिली आहे.

परराष्ट्रमंत्र्यांच्या बैठकीनंतर चीनने सहमती दर्शवण्यात आली होती. त्यानंतर चीनने काही अटी घालत परवानगी दिली आहे. चीनमधील भारतीय दूतावासांनी विद्यार्थ्यांना एक गुगल लिंक देऊन नाव नोंदणी करण्यासाठी आवाहन केलं आहे. तसेच चीनच्या बाजूने भारतीय विद्यार्थ्यांची यादी बनवण्यासाठी आणि त्यांना परत येऊन शिक्षण घेण्यासाठी मदत करण्याचं आश्वासन दिलं आहे.

दरम्यान २०२० च्या फेब्रुवारीमध्ये चीनमध्ये कोरोना जास्त पसरण्यास सुरुवात झाली होती त्यामुळे तेथे शिक्षण घेणाऱ्या भारतीय विद्यार्थ्यांना परत यावं लागलं होतं. त्यानंतर दोन वर्ष कोरोनाचे सावट जगभर पसरले होते. या काळात शिक्षण घेणाऱ्या विद्यार्थ्यांना मोठं शैक्षणिक नुकसान सहन करावं लागलं आहे. त्यानंतर आता विद्यार्थ्यांना उर्वरित शिक्षण घेण्यासाठी चीन सरकारकडून सशर्त परवानगी मिळाली आहे.