कोलकता : भारतीय जनसंघाचे संस्थापक श्‍यामाप्रसाद मुखर्जी यांच्या मृत्यूच्या चौकशीची मागणी करणारी जनहित याचिका आज कोलकता उच्च न्यायालयात दाखल झाली. श्‍यामाप्रसाद मुखर्जी यांचा मृत्यू २३ जून १९५३ रोजी काश्‍मीरमध्ये तुरुंगात असताना झाला होता. श्‍यामाप्रसाद मुखर्जी यांचा मृत्यू नैसर्गिक होता काय, अशी विचारणा याचिकेत केली आहे. श्‍यामाप्रसाद मुखर्जी हे पंडित नेहरू यांच्या मंत्रिमंडळात मंत्री होते.

परंतु त्यांनी काश्‍मीरच्या मुदद्यावरुन राजीनामा दिला आणि जनसंघाची स्थापना केली. जम्मू काश्‍मीरमध्ये परवानगी न घेता प्रवेश केल्याच्या कारणावरून काश्‍मीरच्या शेख अब्दुल्ला सरकारने श्‍यामाप्रसाद यांना अटक केली होती. मुखर्जी यांच्या मृत्यूनंतर पंडित नेहरू यांनी श्‍यामाप्रसाद मुखर्जी यांच्या आईंना सांत्वनपर पत्र लिहले, परंतु आईने केलेल्या चौकशीच्या मागणीवर नेहरूंनी मौन बाळगले. मुखर्जी यांचा मृत्युमागे कारस्थान असल्याचा आरोप अटलबिहारी वाजपेयी यांनी संसदेत केला होता. मात्र केंद्रात वाजपेयी यांचे सरकार आल्यानंतर मुखर्जी यांच्या मृत्यूच्या चौकशीचे आदेश दिले गेले नाहीत. एवढेच नाही तर नरेंद्र मोदी यांचे सरकार २०१४ पासून सत्तेत असून या घटनेची चौकशी सुरू केली नाही, असेही याचिकेत म्हटले आहे.