नियमितपणे उपवास करणाऱ्या लोकांना कोरोनामुळे होणाऱ्या गंभीर परिणामांचा धोका तुलनेने कमी असतो, असं एका नव्या अभ्यासातून समोर आलं आहे. जे लोक नियमितपणे उपवास करतात त्यांना अनेक लाभ मिळतात तसंच त्यांना डायबेटिस आणि हृदयविकाराचा धोका कमी असतो, असंही निरीक्षण या अभ्यासातून नोंदवण्यात आलं आहे. (Covid 19 News)

बीएमजे न्यूट्रिशन, प्रीव्हेन्शन अँड हेल्थ या साप्ताहिकात हा अभ्यास प्रकाशित करण्यात आला आहे. जे कोरोना (Covid 19) रुग्ण नियमितपणे केवळ पाणी पिऊन उपवास करतात, त्यांना रुग्णालयात दाखल करण्याचा किंवा मृत्यूचा धोका उपवास न करणाऱ्यांच्या तुलनेत कमी असतो, असं या अहवालात नमूद कऱण्यात आलं आहे. उपवासामुळे हृदयविकारांचा (Heart Disease) धोका कमी होतो, हे या आधीही समोर आलं आहे. अमेरिकेतले संशोधक बेंजामिन होर्ने यांनी सांगितलं की, आम्ही उपवासाचे (Intermittent Fasting) आणखी फायदे काय आहेत याचा शोध घेत आहोत. जे लोक अनेक दशकांपासून उपवास करतायत, त्यांना काय फायदे होतात, हे आम्हाला जाणून घ्यायचं आहे.

या अभ्यासामध्ये मार्च २०२० आणि फेब्रुवारी २०२१ या काळात जेव्हा लस उपलब्ध नव्हती, तेव्हा कोरोना झालेल्या २०५ जणांचा अभ्यास केला. यामध्ये ७३ जण महिन्यातून किमान एकदा नियमितपणे उपवास करतात. या लोकांचं रुग्णालयात दाखल करण्याची गरज पडण्याचं प्रमाण किंवा कोरोनामुळे मृत्यू होण्याचं प्रमाण कमी आहे. कारण १२-१४ तास उपवास केल्यानंतर शरीर ग्लुकोज ऐवजी रक्तातलं कीटोन आणि लिनोलेक अॅसिड वापरू लागतं. कोरोनाच्या पृष्ठभागावर असलेल्या एका खाचेमध्ये हे लिनोलेक अॅसिड चिकटून बसतं ज्यामुळे हा विषाणू (Coronavirus) इतर पेशींना चिकटत नाही.

उपवासाचा आणखी एक फायदा म्हणजे उपवासामुळे शरीराला खराब झालेल्या पेशी नष्ट करण्यात आणि त्यांचा पुनर्वापर करण्यास मदत होते. होर्ने यांनी हेही विशेष नमूद केलं की, हे फायदे त्याच लोकांना मिळतात ते अनेक वर्षे, दशके उपवास करत आहेत. काही आठवड्यांच्या उपवासाने फायदे मिळणार नाहीत. मात्र उपवास करण्यापूर्वी डॉक्टरांचा सल्ला घेणं आवश्यक आहे. मात्र उपवास हा कोरोना लसीकरणाचा पर्याय नाही.