नवी दिल्ली : कोरोनाच्या नव्या ओमिक्रॉन विषाणूच्या (Omicron Variant) संभव्य धोका लक्षात घेत आंतरराष्ट्रीय उड्डाणे (International flights suspended till 31 Jan 2022 in india ) 31 जानेवारी 2022 पर्यंत बंद ठेवण्याचा निर्णय घेण्यात आला आहे. नागरी विमान वाहतूक महासंचालकांनी (DGCA) जारी केलेल्या पत्रात ही माहिती देण्यात आली आहे. कोरोना महामारीमुळे गेल्या वर्षी 23 मार्चपासून देशात आंतरराष्ट्रीय उड्डाण सेवा बंद करण्यात आली आहे.

देशातील कोरोनाचे रुग्ण कमी झाल्यामुळे सरकारने 15 डिसेंबरपासून आंतरराष्ट्रीय उड्डाणे सुरू करण्याचा निर्णय घेतला होता, परंतु कोरोना विषाणूचा नवा व्हेरिएंट ओमिक्रॉन आढळून आल्यामुळे आणि भविष्यातील संभव्य धोका लक्षात घेता आंतरराष्ट्रीय विमान सेवा 31 जानेवारी 2022 पर्यंत बंद ठेवण्याचा निर्णय घेण्यात आला आहे.

दरम्यान, अनेक देशांमध्ये ओमिक्रॉनचे रूग्ण आढळून आल्यानंतर अनेक राजकारण्यांनी पंतप्रधान मोदींकडे धोकादायक असणाऱ्या देशांतून देशात येणाऱ्या विमानांच्या उड्डाणांवर बंदी घालण्याची मागणी केली आहे.

केंद्राकडून नव्या गाईडलाईन्स जारी

कोरोनाच्या नव्या व्हेरियंटच्या पार्श्वभूमीवर केंद्र सरकारनेही सुधारित गाईडलाईन्स जारी केल्या आहेत. सुधारित गाईडलाईन्सनुसार, संसर्गाचा धोका असणाऱ्या देशातून आलेल्या आणि लसीकरण पूर्ण झालेल्या व्यक्तींनाही विमानतळावर कोरोना टेस्ट करणे अनिर्वाय असणार आहे.