- विहंग ठाकूर

नवी दिल्ली : विरोधी पक्षनेते देवेंद्र फडणवीस, (devendra fadnavis) प्रदेशाध्यक्ष चंद्रकांत पाटील (chandrakant patil) यांच्यासह राज्यातील भाजपाचे (Bjp) प्रमुख नेते दिल्लीमध्ये (delhi) आहेत. देवेंद्र फडणवीस आणि अमित शाह यांच्यामध्ये बैठक देखील झाली. पण केंद्रीय गृहमंत्री अमित शाह यांनी भाजप प्रदेशाध्यक्ष चंद्रकांत पाटील यांची भेट टाळल्याची चर्चा आहे. गेले चार दिवस चंद्रकांत पाटील दिल्लीत होते. भाजप राज्य पदाधिकाऱ्यांसह त्यांनी अमित शहा यांच्या भेटीची वेळ मागितली होती पण अमित शहा यांनी भेटण्यासाठी वेळ दिली नाही, अशी सूत्रांची माहिती आहे.

मात्र माजी मुख्यमंत्री देवेंद्र फडणवीस यांची अमित शहा यांच्यासोबत दीड तास भेट झाली. राज्य संघटनेतील प्रमुख व्यक्तीला अमित शहा यांनी भेटण्याचे टाळल्याने राजकीय वर्तुळात चर्चांना उधाण आले आहे. दिल्लीला जाण्यापूर्वी चंद्रकांत पाटील यांनी मुंबईत मनसे अध्यक्ष राज ठाकरे यांची त्यांच्या निवासस्थानी भेट घेतली होती. या भेटीनंतर भाजप-मनसे युतीच्या चर्चांना उधाण आले होते. पण चंद्रकांत पाटील दिल्लीत गेल्यावर अमित शाह यांनी भेट टाळली.

भाजप-मनसे युतीबाबत त्यामुळे चर्चा झाली नाही. या घडामोडीमुळे भाजप आणि मनसे युतीवर प्रश्नचिन्ह निर्माण झालेय. पुढच्यावर्षी मुंबई महापालिकेबरोबर उत्तर प्रदेश विधानसभेची निवडणुकही होणार आहे. मनसेने हिंदुत्वाची कास धरल्यापासून उत्तर भारतीयांबद्दलचा विरोध थोडा कमी झाल्या. पण मनसेने उत्तर भारतीयांचा मुद्दा सोडलेला नाही. २०२२ च्या उत्तर प्रदेश विधानसभा निवडणुकीत महाराष्ट्रात मनसेसोबत युती केल्यास भाजपाला फटका बसण्याची शक्यता नाकारता येत नाही, त्यामुळे भाजप-मनसे युतीबाबत एक प्रश्नचिन्ह आहे.