Israel attacked on Hamas: गाझा शहरातील अल शिफा रुग्णालयानंतर इस्राईलने उत्तर गाझामधील आणखी एका रुग्णालयाला आपल्या हल्ल्यांचे लक्ष्य केले आहे. ‘इंडोनेशियन’ या नावाच्या या रुग्णालयात हजारो रुग्ण आणि विस्थापित अनेक आठवड्यांपासून आश्रयाला असून त्यांचा जीव या हल्ल्यांमुळे धोक्यात आला आहे. गाझामधील रुग्णालयांमध्ये हमासचे दहशतवादी लपून बसले असल्याचा इस्राईलच्या लष्कराचा दावा आहे. या संघर्षात गाझामधील आरोग्यसेवा मात्र पूर्णपणे कोलमडली आहे.

अल शिफा रुग्णालयाच्या परिसरात अनेक दिवस संघर्ष झाल्यानंतर या रुग्णालयातून बहुतेक सर्वांना सुरक्षितस्थळी हलविण्यात आले आहे. यानंतर आज उत्तर गाझामधील इंडोनेशियन रुग्णालयाच्या परिसरात जोरदार हल्ले झाले. अल शिफावर हल्ले होत असल्याने तेथील आणि इतर भागांतील अनेक जखमी रुग्ण आणि सामान्य नागरिकही या रुग्णालयात आश्रयाला आले आहेत.

रुग्णालयाच्या परिसरात इस्राईलचे रणगाडे दिसत असून मोठ्या प्रमाणावर गोळीबारही सुरु असल्याचे या रुग्णालयातील कर्मचाऱ्यांनी सांगितले. हमासला लक्ष्य करण्याच्या प्रयत्नात सामान्य पॅलेस्टिनी नागरिकांचा आणि त्यांचा जीव वाचविण्याचा प्रयत्न करणाऱ्या रुग्णालयांचा बळी जात असल्याची टीका जागतिक आरोग्य संघटनेने केली आहे.(Latest Marathi News)

जेरुसलेम : हमास आणि इस्राईल यांच्यातील संघर्षाची व्याप्ती वाढली असून लाल समुद्रातून भारताकडे येणाऱ्या एका मालवाहतूक करणाऱ्या जहाजावर येमेनमधील हौथी बंडखोरांनी सोमवारी हल्ला करत ते ताब्यात घेतले. हे जहाज इस्राईलमधील एका कंपनीच्या मालकीचे आहे. या जहाजावरील २५ कर्मचाऱ्यांनाही बंडखोरांनी ओलिस ठेवले आहे. इस्राईलशी संबंध असल्यानेच जहाजावर हल्ला केल्याचे आणि यापुढेही असे हल्ले करणार असल्याचे हौथी बंडखोरांनी स्पष्ट केले आहे. (Latest Marathi News)