बंगळूर : राज्य विधिमंडळाचे अधिवेशन सोमवारी सुरू झाले. राज्यपाल थावरचंद गेहलोत त्यांचे भाषण संपत असतानाच भाजप आमदारांनी ‘जय श्री राम’ (Jai Shri Ram) आणि काँग्रेसच्या आमदारांनी (Congress MLA) ‘जय भीम’चा (Jai Bheem) घोषणा केल्याची घटना घडली. भाजप आमदारांनी (BJP MLA) भगवी शाल परिधान करून अधिवेशनात सहभाग घेतला.

अधिवेशनाच्या पहिल्या दिवशी राज्यपालांनी सभागृहाला संबोधित केले. राज्यपालांनी (Governor Thawar Chand Gehlot) जय हिंद, जय कर्नाटक, धन्यवाद म्हणताच भाजप सदस्यांनी ‘जय श्री राम’चा जयघोष केला. दरम्यान, राष्ट्रगीत वाजवण्यात आले. एनडीए आघाडीतील धजद सदस्य कोणतीही घोषणा न करता तटस्थ राहिले.

विधानसभेत भाजपच्या सदस्यांनी भगवा शाली परिधान केला असला तरी धजदच्या सदस्यांनी भगव्यापासून अंतर राखल्याचे दिसून आले. तत्पूर्वी, विधानसभेच्या संयुक्त अधिवेशनाला संबोधित करण्यासाठी आलेले राज्यपाल थावरचंद गेहलोत यांचे परंपरेप्रमाणे स्वागत करण्यात आले.

राजभवन येथून विशेष वाहनाने आगमन झाल्यावर त्यांना शिष्टाचारानुसार आमदार निवासाच्या प्रवेशद्वारावर ताफ्याने आणले. विधानसौधसमोर आल्यानंतर राज्यपालांचे विधानसभेचे अध्यक्ष यु. टी. खादर, विधान परिषदेचे अध्यक्ष बसवराज होरट्टी, मुख्यमंत्री सिद्धरामय्या, कायदा व संसदीय कामकाज मंत्री एच. के. पाटील यांनी पुष्पगुच्छ देऊन स्वागत केले.